't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

(1644)–Jan Jansz. Deutel– rechtenstatus


[Wel saligh sijnse opter aerden levende]
Na de wijse: Van een dansliedeken. Die Nachtegael die sanck een liedt dat leerde ick.
[pagina 387]
WEl saligh sijnse opter aerden levende, Al die de vreese Gods hier zijn aenclevende, Die gaen in al sijn weghen, ter deghen, Al na sijn woort, soo dat behoort, Dat sy hier hebben verkreghen. Den arbeyt uwer handen ghy hier eten sult Alsulcke gaven daer die Heer u mee vervult, En ghy zijt dan mits desen, ghepresen: Saligh altijdt, u dies verblijdt, Seer wel sal u dan wesen. V wijf ghelijck een wijngaert ranck vol druyven soet, Die overvloedigh brenght haer vruchten metter spoet Is sy, ghy moghet weten, gheseten, Aen uwen wandt, seer vast gheplandt, Dit heeft die Heer gheheten. V kinderen die Godt u is toevoeghende, Daer in ghy moeght u wesen wel benoeghende, Als planten van olyven, beklijven, Aen uwen disch, sy staen gewisch, Dus wil u Godt gherijven. Dus siet hoe dat die mensch hier wordt ghebenedijt Hoe dat die Heer hier boven hem altijdt verblijdt, Die kan den Heer der Heeren, soo eeren, Dat hy altoos, hoort sijnen voos, Sijn vreese wil hanteeren. V moet ghebenedijen God met zijnder stem Dat ghy moeght sien die goeden van Ierusalem Wt Syon uytverkoren, wilt hooren, Die Heere gheest, soo langhe ghy leeft
[pagina 388]
Dees gracy u te voren. En ghy met uwen ooghen meest beschouwende Die kinder dijnre kinderen menighfouwende, Dat zy alhier by namen, versamen, In Israel, verstaghet wel Altijdt met vreden, Amen.