Aen den vrientlijcken Leser.
Het gaet waerde Leser van't quade int ergher, alle saecken mislucken tegen alle hope, so dat wy 'tbegeerde minste, maer 'tgevreesde meest verwerven. Wie hadde een wel ghehoopt, dat wy, na dat het Tyrannische Iuck vande groote bloedtstortinghen om religions saken niet sonder groote bloedtstortinghe van den halse was geschuddet, ten laetsten noch enmael met rusten, de ghewenschte vryheydt inden Conscientien wat ghenoten soude hebben? Wat sietmen nu doch (leyder) minder worden? Wat verneemtmen doch anders dan dat d'een Nemroth d'ander uyt drijft. Ia dat int schoonghevaeghde Huys voor eenen gheruymden Duyvele seven argher inne komen? Voor eenen verdreven Hispanischen Inquisition verneemtmen verscheyden andere. Elck maect sich selfs een Inquisiteur over een anders gheloove, elck wil anderen na zijnen pype doen dansen, ende elck wil ghebieden over een anders conscientie. Ende dees elck is noch meest de ghene die sich voormaels derhalven swaerlyck heeft beklaecht over anderen, ende daer by noch meest soo onverstandigh, dat hy zijn eyghen gheloove gheensins verdedighen, swijghe eens anders gheloove recht aenvechten can. Want die twistighe saken zijn soo klaer niet dat alle man met goeden onderscheyde recht daer af can oordeelen. Immers of sy al schoon van selfs licht mochten zijn. so zijn sy voor den duysterlinghen duyster, duysterlingen noem ickse al, die noch in heuren onverstorven ouden huyt ende in hgenluyder aertsche vernuft buyten Christum het licht des Werelts swerven, doolen ende tuymelen. Sodanigher saken een (namentlijck duyster voor den duysterlingen) acht ick 'tstuck vande Nachtmale die minste niet te wesen: die welcke van meer luyden twistelijck wert ghehandeldt dan sekerlijck wert verstaen. Di merckt hy licht die zijn ooghe slaet opten ontallijcken menichten der Kyfboecken, die uyt desen driehoeckighen twist zijn voortghekomen. Comt dit niet door onser eyghen verkeertheydt? Die misbruyck recht verkeerdelijck tot hate, twist, strijt, ende moort, 'tgunt ons voornemelijck is ghegeven tot aenwijsinghe van liefde, eendracht, vrede, ende stichtelijckheydt. Alle sulcx werdt (dit weet ick) van veelen goethertighen menschen (oock mede van my) met treurigher herten aenghesien, ende oock noch wat dat ons op comen sal, soo wy niet eerstdaeghs op en houden aldus te Madianiseren, onderlinghen te werren, elcander te lachteren te verwerpen ende te veroordeelen. Vraechdy wat ick hier meyne? Ick meyn eenen dootlijcken hongher ende verderflijcken ontberinghe des woorts onser zielen eenighen voetsele, d'welck wy soo schendelijcken misbruycken. Wy zijn zat vande vreetsame waerheyt ons walcht van't Hemelsche Man, ende hebben lust na 't Vleesch met zijnen vleeschelijcken opinien daer uyt ons oock dese twist wormen ende Secteryen tusschen den tanden groeyen. Elck smeect soetelijck met zijn eyghen; ende schelt bitterlijck een anders ghebreecken. Ende wy proncken elck voor ander met het recht ghebruyck des blooten Nachtmaels, sonder ons te schamen dat wy desselvens cracht opentlijck versaken, te weten liefde, eendracht ende vrede. Tot aenwijsinge van welck argherlijck ghebreck tot minderinghe van't selve metten hatelijcken twisten daer uyt rijsende, ende tot meerderinghe vande salige Liefde vermoghende eendracht ende Christelijcke vrede ick wat ghestelt hebbe by gheschrift. V waerde Leser ten dienste. Voor de moeyte van't welcke ende tydt by my daer inne besteet, ick geen ander dinck noch loon en begeere, dan dat ghy u tijdt hier inne wilt besteden met 'tselve eenmael onpartijdelijck aendachtelijck te willen doorlesen. Niet twijfelende so ghy 'tgunt hier
Auteursrechtvrij