Cirurgia of Hantgewerck int lichame der menschen

90. Wat salmen doen als die kake is gebroken?

Maer men salse heffene(n) ende wel stellen alsoot mogelijc is metten vingeren inden mont ende onder heffene trecken ende wel voegen dat een in dat andere oft tegen dat andere, ende binden die tanden metten anderen gansen tanden met draden oft men mach. Ende daer bouen leetmen een consolidatijff als voirseit is ende daer bouen cusseneelen binden ende leggen int rusten, ende men geue hem suptijle spijse sonder knouwen.