Cirurgia of Hantgewerck int lichame der menschen

56. Wat suldij doen tot wonden in den hals ende in de kele ende welc soo sijn die vreeselijcxte¹ ?

Wonden die daer geuallen dweers snijdende om dat sij mochten snijden aderen, arterien, senuwen, muskelen, die weech der spijsen, die weech des buycx, des adems, der spondilen van micha die vanden hersenen comen totten rugge. Ende sijnder aderen oft arterien die bloeden, die salmen stoppen alsmen eerst mach. Ende sijn sij dweers ontween, soo naijse ende daer op soo stroijt dat puluer voirseit. Ende sijn die senuwen omtrent den hals omtween, soo vergeer icse metter naelden ende naijse, soo ic best mach, ende legge daer op lombricos t(er)restres, dat sijn pierwormen oft² teken, gewreuen ende gesoden in olien, ende ic heelt voort soo ic best mach alsoot behoort.

1 vreeselijcxte : het Hs. heeft vreeselelycxte.

2 Na oft staat in het Hs. de.