Cirurgia of Hantgewerck int lichame der menschen

13. Wat salmen doen oft tbeen al aff ware ende doirgaende beijde die tafelen tot dura mater ?

Ic soude dat been vuijte pellen, vanden vacke doen op dattet hanget noch daer aen, ende hancter¹ daer aen niet soo veel vlees dattet daer aen weder mochte heelen, soo heffen ic die canten vanden beene ende ruhede, ende naije dat vac weder aen op elcke sijde. ende in die middel totter nedester sijden soo soudic snijden een gat op dat ic daer eene wike in mochte leggen om die hersenen te suueren daer dore; dat is beter dan dat vac al aff gesneden, want tmaect schoone litteekenen ende die hersenen blijuen te bat gedect ende beschut van couden. Ende die nieuwe wonden salmen open houden tot tbeen weder gewonnen is aen dat verloren vac, of anders soude die wachede van vleese beletten dat been weder te heelene alst te voren was.

1 hancter : het Hs. heeft hanctet.