Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest

Het seven en tnegenstichste Liedeken, ende is een liet om te singhen

voor de gene die met woorden ofte gesanck worden wellecoom gheheeten.

Op de wijse: Schoon lief wilt my troost gheven.

IN danck wy dit ontfanghen
Na u was ons verlanghen,
Vrede moet u oock sijn,

[p. 244]

 

Vrede moet u oock sijn

 

Vanden Heere hier boven,

 

Voor al wy hem seer loven

 

Die ons tsamen bracht fijn.

 

AN zijn woort laet ons houwen

 

Alle ydelheyt schouwen,

 

En spreken singhen soet

 

En spreecken singhen soet,

 

Van Godts Wetten en zeden,

 

Oock ander goede reden

 

Die t'hert vermaken doet.

 

IA zijn woort laet ons spreken,

 

En mijden qua ghebreken,

 

Schouwen dydel geclap,

 

Schouwen dydel gheclap,

 

Want al onnutte reden

 

Die wy met ons mont deden

 

Comen in rekenschap.

 

COmen sullen wy waerlijck

 

Voor Godts Oordeel vervaerlijck,

 

Daer d'achterclappers quaet,

 

Daer d'achterclappers quaet,

 

Of die aer qua clap gheven

 

Voor den Heer sullen beven

 

Dan voor haer is gheen raet.

 

Beminde inden Heere

 

Dit laet doch nimmermeere

 

Wt onser herten gaen,

 

Wt onser herten gaen

 

In ons woorden en wercken,

[p. 245]

 

Laet ons dit wel aenmercken

 

Dat wy moghen bestaen.

 

SOO oock in Godes vresen

 

Met een stichtelijck wesen,

 

Laet ons vermeyen gaen,

 

Laet ons vermeyen gaen

 

Op weghen en Landouwen,

 

Ende daer wel aenschouwen

 

Godts wonderwercken saen.

 

Niet te vergheefs gheeft d'Heere

 

Bloemtjes schoonheyt, en meere

 

Der soete voghelen sanck,

 

Der soete voghelen sanck,

 

Tis om te sien en hooren,

 

De soeticheyt te vooren

 

En schoonheyt Godts plaeysant.

 

VAN DEse Heerseer goedich

 

Comt talles overvloedich

 

Wat onse ooghen sien,

 

Wat onse ooghen sien:

 

Wat d'oor hoort wilt dit vaten

 

Wat ruyckt in de neusgaten

 

Wat de tongh smaeckt met yen.

 

Recht wat wy voelen meden

 

Met hant of ander leden,

 

Talles van d'Heere is,

 

Talles van d'Heere is,

 

Laet ons in hem verblijen

 

En hem ghebenedijen

 

Met woorden wercken wis.

[p. 246]

 

Yeghelijck van u tsamen

 

Dancken wy oock met namen

 

Dat wy u welcoom zijn,

 

Dat wy u welcoom sijn

 

Twelck ghy aen ons laet blijcken,

 

Met wort en daden rijcken

 

Danck sy u daer voor fijn.

 

Prince ons Godt verheven

 

Laet maer int eeuwich leven,

 

Al by de vrome schaer,

 

Al by de vrome schaer

 

Ons daer oock welcoom wesen,

 

Van alle druckt ghenesen

 

Wy daer sullen sijn claer.