Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest

[p. 213]

Het sevenentachtentichste Liedeken, ghemaeckt aende vrienden in Goylant,

Op de wijse vanden 100.Psalm: Ghy volckeren des aertrijcks al.

AEnhoort een liet tesamen al
Die lust hebt tot cleyn ghetal,
Begheeft u leden heel bequaem,
Vwen Heer te sijn ghehoorsaem.

Schickt u te gaen door d'enghe poort

Dat is die rechte nieu gheboort,
Als boude mensche, wert ghedoot,
Ent sondich wesen uytgheroot.

En aenghetoghen Nedrich slecht

Den nieuwen mensch heylich oprecht,
Die daer is gheschapen nae Godt,
Met lust leeft nae t'heyligh ghebodt.

In vreedsaemheyt in recht ootmoet

Met een sachtmoedich wesen soet,
Met een hertlijck ontfermen reyn,
Over sijn naesten int ghemeyn.

Lanckmoedich met ware ghedult

Boven dit al ghy aen doen sult,
Die liefde reyn schoon en dierbaer,
T'kenteecken der Christlijcke schaer.

Dit is den bant volcomen sterck

Een vast gheweer ende bolwerck,
Teghen alle duyvels ghewelt,
Die hy als nijdt int wercke stelt.

Soo langhe dese bant ons bint

[p. 214]

 

En wy oprecht Hemels ghesint,

 

Leven vreedsaem in goet accoort,

 

Dan blijft ons huys al onverstoort.

 

Dan is met ons die Heer altijdt

 

Dan moghen wy staen in den strijdt,

 

Dan sullen wy verwinders sijn,

 

Verlost van alle noodt en pijn.

 

Dan sullen wy nae desen vry

 

Aenschouwen Christi aenschijn bly,

 

Die is doch die Liefhebbers loon,

 

Hy belooft haer des levens croon.

 

O liefde reyn ons doch vervult

 

Met lieffde en ware ghedult,

 

Maeckt ons volstandich tot den ent,

 

Soo brengt ghy ons in s'Hemels tent.