Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest

Het acht en sestighste Liedeken,

Op de wijse: Om een Nieuwe Iaer sy haren Man badt, Of: al eer
men comt ter eeren siet, so moet men hier veel lijden.

AEN siet Godts wonder wercken al
Wilt die te recht aenschouwen,
Groot ende veel is het ghetal,
Gheen sinnen cant onthouwen
Van alle Schepsels groot en kleyn,
In Hemel ende aerden,
Wilt dit ghemeyn // wit dit ghemeyn
Vertellen desen hooch vermaerden
Sijn wercken reyn.

CLAEr helder is der Sonnen schijn

[p. 158]

 

Hoe claer moet dat licht wesen,

 

Diet al verlicht in Hemel fijn,

 

Daert al van is gheresen

 

Wonder om begrijpen // wie sal,

 

Ia wie sal sijn ghenade,

 

Verconden al // verconden al

 

Ghebruyckt u tongh vroech ende spade

 

Hier toe int dal.

 

Slaet hier af vry gheluyt met cracht

 

Met eenen vierich herte,

 

Dat wonder dat Godt heeft ghewracht,

 

Al sou ghy lijden smerte

 

Vertelt Godts liefde, tsoet ghesicht,

 

Int schencken van sijn Soone,

 

Dat clare licht // dat clare licht,

 

Dat settet hooch en wel ten toone

 

Met goet bericht.

 

IAE dit laet sijn uwe arbeyt

 

Roept en vermaent die menschen,

 

Wt Liefd' ende ghehoorsaemheyt,

 

Na Christi rijck wilt wenschen

 

Slaet die Basuyn vroech ende laet,

 

Dat die menschen op waecken,

 

Al metter daet // al metter daet

 

Op dat sy alle moghen smaecken

 

Godes ghenaet.

 

COPeren of Metaels trompet

 

Blaest niet // maer Godts woort reyne,

 

Gheen menschen dicht daer by en set,

 

Maer die waerheyt alleyne

[p. 159]

 

Blaest soo met eenen toone soet,

 

t'Euangelijs bly mare,

 

Wt vierich gloet // uyt vierich gloet

 

Op dat alsoo die menschen schare

 

Doen rechte boet.

 

SOO hoort dees raet bereyt u wel

 

Neemt waer u eyghen ganghen,

 

Voor al teghen die pijlen fel,

 

Al van den Vyant stranghen

 

Noyt schalcker list met schoonen schijn,

 

Als dijdel eere schadich,

 

Tis dootlijck fnijn // tis dootlijck fnijn

 

Tis voor die Ziele seer moordadich

 

Maer t'schijnt goe wijn.

 

Peynst altijdt op ws Heeren eer

 

In alle uwe reden,

 

En op s'menschen salicheyt meer,

 

Tracht na Liefd' ende vreden

 

En leert u meesters seden wel,

 

Reynhertich en ootmoedich,

 

Sachtmoedich snel // sachtmoedich snel

 

Soo sal stichten u leere goedich

 

Na Godts bevel.

 

Paulus een oprecht Christen helt

 

In yver vierich brande,

 

Een navolgher Christi int velt,

 

Toont dat als een valjande

 

En wilt dat wy hem volghen na,

 

Recht als hy Christus dede

 

Sijt vroech en spa // sijt vroech en spa

[p. 160]

 

Al in aendachtighe ghebeden,

 

Tis Christi rae.

 

SOO Neemt van my dit Liet in danck

 

Mijn Broeder inde Heere,

 

Denckt op dat groote loons ontfanck,

 

Weest vierich in die leere

 

Een onverganckelijkce Croon,

 

Gheen hert en cant bedincken,

 

t'Hemels Licht schoon // t'Hemels licht schoon

 

Ghelijck die Sonne eeuwich blincken

 

In s'Hemels troon.