Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
AuteursrechtvrijOp de wijse: Waeckt op ghy Christenen alle.
GHenade ende vrede
Wensch ick u Broeder mijn,
De cracht des Gestes mede
Om te verstercken dijn,
En also vast mocht houwen
In liefdt en eenicheyt,
Om namaels te aenschouwen
Godt in zijn heerlijckheyt.
CLAErelijck wilt versinnen
| |
[pagina 98]
| |
Wt Godes crachtich woort,
V naesten te beminnen
In liefden soo't behoort,
Om neerstich voor te draghen
Godes woort ende leer:
Wilt hier in niet vertraghen
Maer doch toe nemen meer.
Soo laet u niet beweghen
Maer hout hier in goe maet,
Al comen u hier teghen
Veel boose winden quaet,
Maer wilt u doch vast houwen
Aen Godes crachtich woort:
Wilt u daer op vast bouwen
Ende volherden voort.
IA Godes woort en leere
Twelck suyver is en reyn,
Wilt uwen naesten teere,
Mee deelen int ghemeyn,
Wilt haer dat oock voort draghen,
In rechter vrientlijckheyt,
V selven niet behaghen
Door waer ootmoedicheyt.
Cloecklijck wilt u bewijsen
En niet versuymen voort,
Vwen naesten te spijsen,
En troosten met Godts woort,
Op dat soo mach vermeeren,
Het rijck Christi bequaem,
Tot lof van Godes eeren
| |
[pagina 99]
| |
En prijs van sijnen naem.
Poocht u met neersticheden
Inden gheloove sterck,
Aendachtich voort te treden,
Dat ghy met daet en werck,
V naesten meucht vermanen
Om int gheloof vruchtbaer,
Seer neerstich voor te gaene
Sonder afwijcken zwaer.
SOO wil ick u hier mede
Nu en tot allen tijt,
Wenschen des Heeren vrede
Om met herten verblijt,
Te verwachten in vreuchde
Des Heeren toecomst saen,
En met grooten gheneuchde
In zijn glory te gaen.
Wilt dit van my ontfanghen,
Wt Broederlijcke aert,
Laet ons al met verlanghen
Ons toonen onbezwaert,
Om malcander te stichten
Met Godes woort en leer.
Godt die wil u verlichten
In deuchden altijt meer.
F.P. |
|