Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
Auteursrechtvrij
[pagina 41]
| |
Op de wijse: Edel Karsou Maechdeken suyver.
INt nieuwe Iaer
Wilt nu vierich ontwaecken,
Ghy Menschen al ghelijck
Ghy Christen schaer,
Prijst Godt in dese saecken,
Looft hem oock arm en rijck
Die u minlijck
Verlost heeft uyt doots banden,
Denckt het naer, o Christen schaer,
Prijst hem in alle Landen.
Int nieuwe Iaer
Wilt u tsamen bereyden,
Ghy volcken al ghelijck
T'ontfanghen claer,
Den Heer der eeuwicheyden,
Hy wiert arm die was rijck,
Comt blydelijck
Wt d'Hemel hooch verheven,
Om ons uyten slick, doots strick,
Te leyden totten leven.
Int nieuwe Iaer
Wilt dese gaef ontfanghen,
V hert verlanghen laet,
O Christen schaer
Hy vrijt u van verstranghen
Des doots der hellen zwaer,
| |
[pagina 42]
| |
Hy is de Helt
De Leeu Iuda ghepresen,
Die door sijn ghewelt, vermelt
Den vyandt heeft verknesen.
Int nieuwe Iaer
Rijst ons de son ghepresen,
Om te verlichten soet
Ons menschen schaer,
Verclaert in't Hemels wesen,
Waeckt op duyster ghemoet:
Want u licht goet
Schijnt nu door Gods weldaden,
Blijft niet inder nacht, veracht,
Neemt wel waer Godts ghenaden.
In't nieuwe Iaer
Is ons een kint gheboren,
O Mensch bedenckt dit werck,
Wt liefden claer
Droech hy des Vaders toren
Met smerten in dit perck,
Heeft soo sijn kerck
Ghewasschen metten bloeden,
Totten levens pleyn, seer reyn,
Hier tot brenght u ghemoeden.
In't nieuwe Iaer
Een Soon is ons ghegheven,
Wiens heerschappy is groot,
O eeuwigh vaer
Ghy helpt ons totten leven,
Verlost ons vanden doot,
| |
[pagina 43]
| |
V rijck minjoot
Maeckt ghy u Bruyt ghemeyne
Denckt dit goet, o Menschen soet,
Looft hem met herten reyne.
Int nieuwe Iaer
Met vrolijckheyt verheven,
Het aertrijck spreken sal
Bloemkens eerbaer,
En Voghelkens die leven,
Die maecken groot gheschal,
Ghetuyghen al
Van haren Schepper heylich:
Mens versint, u oock verbint
Te brenghen vruchten veylich.
Prince minjoot
Int nieuwe Iaer wilt leven,
Als vruchtbaer boomen goet,
O Schepper groot
Door uwe macht verheven,
Wy treden mette voet,
T'oncruyt verwoet
Int oude Iaer ontfanghen,
Ghesaeyt quaet,
Door Duyvels raet
O Heer vordert ons ganghen.
|
|