Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
Auteursrechtvrijop de wijse vanden 80. Psalm. Ghy Herders Israels wilt hooren.
BEreyt u nu tot allen tijden,
Mijn lieve kint om vroom te strijden
Teghen uws vleys lusten quaet,
Die doch vromelijck wederstaet
Met eenen vast gheloove fier,
Op dat ghy mocht verwinnen hier.
ARbeyt altijt in dit saysoene
Om u jeuchd'lijcke leden coene,
Te gheven tot Godts dienste eerbaer,
Heylich end' oock seer reyn eenpaer,
V te houden van sonden fijn,
Laet dit al u betrachten sijn.
Aendachtelijck wilt doch aenvaten
Des Heeren jock tot uwer baten,
Want dat is soet en licht voorwaer,
So Christus spreeckt int openbaer,
En die dat nu draghen met lust
Die sullen hier naemaels in rust.
Ras comen al sonder bezwaren
In blyschap groot hoort dit verclaren,
Die hier noyt ooghe heeft ghesien,
Daer sullen sy nae Schrifts bedien
In eeuwicheyt altijt sijn bly
Van alle druck en lijden vry.
Te recht wilt altijt hier nae sporen
| |
[pagina 22]
| |
Mijn lieve kint in Godt vercoren,
En nu in uwe jonghe jeucht,
V Ledekens altijt tot deucht
Schicken op dat ghy also reyn,
Den Heer meucht behaghen certeyn.
GENeucht en vreucht wilt altijt soecken
In Godes woort ghelijck de cloecken,
En scheyt u oock met herten reyn
Van dees werelts wesen ghemeyn,
Wijckt doch van haer weghen verblent
Want haer naecket een deerlijck ent.
GERust stelt oock altijdt u sinnen
Om Godt boven al te beminnen,
Wt al uwe crachten ydoon,
Wilt neerstelijck betrachten schoon,
Te leven nu in deser tijt
Nae sijnen wilt met grooter vlijt.
RIcht wilt u altijt neerstich keeren
V Vader en Moeder te eeren,
Want dat is so Paulus verclaert,
Het eerste ghebodt hooch vermaert,
Dat een beloft heeft dit recht vaet
Van lanck te leven delicaet.
Te recht wilt u nu hier na pooghen
Om dit stedich voor uwen ooghen,
Te draghen dat ghijt nimmermeer
Niet en vergeet, maer t'uwer eer
Meucht betrachten met neersticheyt,
Dan sal u tleven sijn bereyt.
Siet dan mijn lieve kint verheven
| |
[pagina 23]
| |
Hebt ghy lust tot het eeuwich leven,
Soo wilt u nu tot deser uer,
Hier toe beneerstighen seer puer
Om uwe Ouders seer bequaem,
Nu altijt te sijn ghehoorsaem.
Dat ghy weet dat haer sout mishagen
En wilt dat doen tot genen daghen,
Volbrenghen oft nemen ter hant
Want het soudt u sijn groote schant,
Tsou Godt oock mishaghen met cracht
Dus u neerstelijck hier voor wacht.
OCH Wilt altijt ghedachtich wesen
Op al het goet dat sy in desen,
Aen u hebben bewesen pleyn,
En wilt oock nu weer int gemeyn
Haer eeren ghelijck dat behoort,
Want also leert u Godes woort.
Te recht bidt ick u noch int leste
Mijn lieve kint dat ghy naet beste
Stedich wilt haken nu ter tijt,
En u jonghe leven subijt
Zo over brenghen nae Gods wil
Dat ghy hier na sonder gheschil.
Een cleet seer Wit van sijde schoone
Meucht krijghen en in s Hemels troone
Ghecroont werden heerlijck en fris,
Met eenen croon van Gout ghewis
O lieve Ieucht schickt u gheheel
Om te vercrijgen dit schoon deel.
Recht wensch ick dat de Heer Almachtich,
| |
[pagina 24]
| |
V wil bequaem maecken seer crachtich,
Dat ghy u jonghe leven nu
Meucht volenden in deucht en trou,
En so hier na in eeuwicheyt
Leven in Godts rijck met bescheyt.
|
|