Het Rijper Liedtboecxken inhoudende hondert schriftuerlijcke liedekens dewelcke noyt voor desen in druck en zijn gheweest
(1624)–Jacob Claesz–
Auteursrechtvrij
[pagina 1]
| |
op de wijse: Aenhoort ghy uytvercoren geslacht. Ofte vant Burghers kint.
AVerechs is des menschen doen
Van Ioncx tot quaet genegen,
Hierom ghy jonghe spruytjes groen
Verlaet des sondaers wegen,
Leeft ghy naet vleesch behaghen
Ghy sult het u beclaghen,
Eeuwich hier naer // in pijne zwaer
O jeucht neem dit wel waer.
Kent doch hoe cort dat is u tijt
Wat mach de werelt baten,
Als u de doot aen comt subijt
Dan salt u al verlaten,
Des vlees wellustich leven
Wat is daer aen bedreven,
O Ionghe jeucht // des werelts vreucht
Tis een so cleyn gheneucht.
Hebt doch u lust van jonckheyt aen
Al in de Wet des Heeren,
Van Ioncx op weest Godt onderdaen
En wilt u ouders eeren,
V naesten wilt beminnen
Wt reyner hert en sinnen,
Stelt u ghemoet // na 't Hemels goet
O jonghe spruytjes soet.
Int Hemelrijck verstaet wel mijn
| |
[pagina 2]
| |
Daer sijn ghemaeckt haer straten
Van Peerlen en van Goude fijn,
O Ieucht wilt dit wel vaten,
Schickt u o Ionghe bloemen
Dat ghy daer in meucht coemen
Dit wel versint // mijn lieve kint
Godts rijck voor al bemint.
Die rijcks kinders verstaet wel mijn
Sullen als sterren blincken,
In claerheyt als der Sonnen schijn
Wilt dit o Ieucht bedincken,
De Heer sal haer dan loonen
Heerlijck met vreuchden croonen,
En salse dan, ghelijck een man
Lieffelijck nemen an.
Dochterken kleyn, uyt liefden reyn
Most ick u dit Liet schencken
Dit is serteyn, mijn beedt alleyn,
Dat ghyt recht meucht bedencken
Schout doch des werelts wesen
En wilt den Heer recht vreesen,
Dats mijn begheer // van herten seer
Helpt ons o lieve Heer.
|
|