Op de gesontheyt, en hare weerdigheyt.
Gesontheyt, edel dingh! van u is 't dat wy schrijven,
Op dat uw soete lucht by ons sou mogen blijven,
Op dat een yeder mensch mocht kennen uwen aert,
En hoeje dient geviert, en hoe te zijn bewaert.
Gesontheyt, schoon juweel! voor alle dingh te prijsen,
Wie kan na rechten eysch u eer genoegh bewijsen?
Ghy zijt een rijck geschenck dat van den hemel daelt,
Dat als een gulde son hier op der aerden straelt;
Schoon yemant van het volck, tot hoogen staet verheven,
Magh, boven sijns gelijck, in glans en eere leven,
Getroetelt van een prins, oock na sijn vollen wensch;
Soo ghy hem niet en streelt, wat is'er van den mensch?
Schoon yemant machtigh vee, door Godes milden zegen,
Schoon yemant groot beslagh van landen heeft gekregen,
Schoon yemants rijcke schat vervult een gansche zael,
Ach! sonder uw behulp, wat is'et altemael?
Schoon yemant voor hem siet een tafel vol gerechten,
Die staêgh wort aengedist met hondert fluckse knechten,
Schoon yemant wort getoeft met alderhande wijn;
Sit ghy niet aen den disch, 't is al maer enckel pijn.
Schoon yemant hoort den sangh van hondert soete keelen,
En hoort een geestigh volck op gulde snaren speelen,
Als ghy maer henen gaet en uyt de kamers vliet,
Soo is de gansche vreught niet anders als verdriet.
Schoon yemant is geplaetst daer, met een aerdigh jocken,
Veel geesten besigh zijn om blijtschap uyt te locken;
Eylaes, de soete praet bevalt de gasten niet,
't En zy ghy aen het volck uw soete gunste biet.
Schoon dat de sonne schijnt, dat alle kruyden groeyen,
Dat al het boom-gewas staet lustigh om te bloeyen,
En dat de koele Mey ons brenght den soeten tijt;
't Is winter evenwel soo ghy'er niet en zijt.
Schoon yemant heeft de keur van duysent schoone vrouwen,
En mach het puyckjen selfs van alle maeghden trouwen;
Godinne, sonder u en heeft'et geenen val:
Want al wat honigh scheen en is maer enckel gal.
Wat dient'er meer geseyt van alle werelts saken,
Die niet gesont en is, wie kan hem vrolijck maken?
Wel aen dan, wieje zijt, gaet, soeckt dan aldermeest
Gesontheyt aen het lijf, gesontheyt aen den geeft!
|
|
Auteursrechtvrij