Den Drucker tot den goetwillighen zangher, Saluyt.
Lustighen Zangher die ghenouchte schept int zinghen, hier hebdy Casteleyns Liedekins met de voysen oft wysen daer by ghevought, die ick met groote moeyte, cost ende aerbeyt, deur langhe ende veel zouckens vercreghen hebbe van zommighe liefhebbers binnen ende buyten Audenaerde, ende daer naer op musijck noten ghestelt, op dat, die de voysen niet en weten te beter moghen daer aen gheraken.
Ghenouchlick wilt singhen een liedeken jent
Hier wt dit boecsken met blyden gheeste:
Jaeght droefheyt wech, maect vreught bekent,
Laet blijcken v conste waer ghy zijt ter feeste,
En coopt elck hier een af minst ende meeste
Jndient v aenstaet, tsal my wel af staen,
Niemandt en schame hem bin desen foreeste,
Maer nemet int goede dit simpel vermaen,
Alleene wt ionsten is dit ghedaen.
Maer dit mijn beminde vrienden vercoren
Jsser wat anders dat ick sal aengaen,
Lustich om lesen, zinghen en vreught t’oorboren
Jndien ghy my niet en laet in d’oncost versmoren:
Van als dat ick mach, hop’ ick int licht te bringhen,
Spaert my God, moet ick segghen voor alle dinghen.
Auteursrechtvrij