Het gheestelyck blom-hofken van Bethleem
(1664)–Godfried Bussé–
Auteursrechtvrij
[pagina 128]
| |
Cantus.K'Was lestmael inden hof ghegaen, Hoort vrinden
hoort naer mijn vermaen: En soo ick sagh daer
rom-en-dom, Vont ick daer staen een schoone blom.
 | |
[pagina 129]
| |
Bassus.K'Was lestmael inden hof ghegaen, Hoort vrinden
hoort naer mijn vermaen: En soo ick sagh daer
rom-en-dom, Vont ick daer staen een schoone blom.
 | |
[pagina 130]
| |
1.
K'Was lestmael inden hof ghegaen,
Hoort vrinden, hoort naer mijn vermaen;
En soo ick sagh daer rom-en-dom,
Vont ick daer staen een schoone blom.
2.
De blom' die stont my seer wel-aen
Dus moest ick daer-op blijven staen:
Jck saeghse hier ick saghse daer,
Want sy trock jder-een tot haer.
3.
Dus stont ick op dees blom en sagh,
En peysde oft' lanck dueren mach;
Maer ick was qualijck uyt den hof,
Sy lagh ter aerden als het stof.
4.
En is het mensche leven niet,
Ghelijck een blom', die t'wel besiet;
Wie heden krielt van schoonigheydt
Js morghen niet als vuyligheydt.
5.
De blom' die ick u hier verthoon
Is Jonathas jonck ende schoon:
Die door sijn kloeckheydt en verstandt
Deed' beven t'Philistijnen landt.
| |
[pagina 131]
| |
6.
Maer och elaes! t'was haest den tijt
Daer dese blom' nam haer af-scheyt;
Op Gelboe den bergh seer groodt
Besueren moest de bitter doodt.
7.
Daer lagh die blom' daer lagh den helt
Die menigh vyandt had' ghevelt:
Die t'landt der Philistinen wijt
Ghedwonghen had' in sijnen tijt.
8.
O mensch! ô mensch! wie dat ghy zijt
Peyst eens op uwen korten tijt;
Peyst eens dat g'in der aerden schoodt
Sult sijn begraeven naer u doodt.
9.
Ghelijck een blom' die haest verslent
Soo is ons leven hier bekent:
Wie heden leeft in voll' ghenught,
Heeft morghen eenen droeven sught.
FINIS. |
|