Honori & meritis viri amplissimi Gualteri Petri Boudaan
(1761)–Pieter van Braam–
AuteursrechtvrijUrbis Amstelaedamensis consulatum auspicantis ipsis kalendis februariis MDCCLXI.
[Folio A2r]
| |
[Folio A2v]
| |
Flumine qua placidas vitreo pater Amstela ripas,
Urbis et excelsae moenia lambit aquis;
Publica festivi testantur gaudia plausus.
Libantur patriis turea dona focis.
Ominaque optatis Divi dant prospera signis.
Adnuit auguriis Jupiter ipse bonis.
Incola quisque diem laeto clamore salutat,
Certatim et faustos tollit ad astra sonos.
Et merito. Batavae Boudanus gloria terrae,
Ille sui generis summus et urbis honor:
Non modo de clara qui ducit origine stirpem,
Sed proavum cumulat splendida facta novis:
Quem pietatis amans et recti conscia virtus
Exornantque animi nobilioris opes:
Cui Nemesis viridi praecinxit tempora lauru,
Cum studiis sollers otia docta daret;
| |
[Folio A3r]
| |
Et facilis blando adrisit Tritonia vultu
Quemque suum Phoebo turba dicata vocat:
Consilio suadente Patrum, jussuque senatus,
Nec minus et populi lectus amore boni,
Ecce sibi oblato trabeae praesignis amictu
Augustae ingreditur limina sancta domus!
Salve ingens patriae columen, populique voluptas!
Quam bene sunt urbis credita frena tibi!
Consule te certam fas est sperare salutem,
Nam tua dexterior saepe probata fides;
Seu sibi praesidium quum te, Dea juris et aequi
Judice, gauderet tutius esse datum;
Sive etiam curis te nobilis Haga teneret,
Intentum et rebus Patria cara suis;
Turbaque magnanimûm quae foedere juncta virorum
Dat Batavis magnas quas habet Indus opes.
| |
[Folio A3v]
| |
Amstela jure tibi meritos gratatus honores
Te vigilem puppi gaudet adesse Tiphyn.
Atque ego sum vestra quamquam peregrinus in urbe,
Et vix nota tibi nomina nostra reor;
Vota tamen lubuit communibus addere votis,
Et bona sollemni fundere verba die;
Nostraque quos tenera cantabat arundine versus
Audet ad illustres ferre Camena Lares.
Hanc precor adspicias vultu pro more sereno,
Carminaque optatum sint habitura locum.
Providus aeterno qui Numine cuncta gubernat
Adsit consiliis tempus in omne tuis!
Consule te nullo libertas aurea Bruto
Indiget, aut saevi Caesaris arma timet;
Integritasque sibi tutum promittit asylum
Quale olim Romae de Cicerone fuit;
| |
[Folio A4r]
| |
Et quoniam divam non neglexisse Poësin
Diceris, et Phoebi sacra canentis amas,
Quaeque valent artes praeclaros reddere mores
Consulibus dignâ sedulitate colis,
Vive diu! clamant vates, et carmine fausto
Aurea te Patriae secla referre jubent!
Delius ipse, levi dum comprobat omina nutu,
Boudanus Batavûm Scipio dixit erit!
PETRUS van BRAAM.
|
|
I