Geschiedenis van Leuven. Geschreven in de jaren 1593 en 1594

Augustijnen.aant.

tGodtshuijs vande Augustijnen, binnen Loven, es begonst anno 1265, met consent vanden Paus Clemens, die hen consenteerde te moeghen erigeren ende optimmeren bedehuijsen, kercken, cloosters, huijsen ende cellen, in alle steden ende plaetsen hen goet dunckende, sonder iemants wederseggen.

Anno 1270, wert den kerckhoff gewijt, ende eenen aultaer.

Anno 1374, heeft eene deuchdelijcke jouffrouwe, tot Middelborch, haeren knecht, Jan genoempt, eensdeels doer ghiften, eensdeels doer dreijgementen, inden vasten, doen gaen ten heijliegen Sacramente des aultaers, ende als hij dat nutten soude, soo geschiedde daer een openbaer miraeckel, ende de hostie veranderde in siennelijck vleesch ende bloet, ende iij druppelen bloets vielen opde dwele den communicanten voer geleet. Van welck miraeckel de memorie, ten voers. Augustijnen, te Loven, gehouden wordt. Ende de processie hieraff wordden innegestelt anno 1433, diemen noempt de processie vanden heijliegen Sacramente van Miraeckelen, ten Augustijnen.

De orde van den Augustijnen begonst anno [1266].

Die vanden Augustijnen mogen coopen, tot hun selffs drincken, xv aemen Lovenswijn, opde voet als die der Predicaeren, 1420.