Sjweitberg (onder ps. G. Rapaille)

[p. 16]

Este de geheime van Sjweitberg wils weite moste mit d'r Feel kalle, este 'm mer neet vreugs wórom ziene pap - d'r Sjoewe Fransse - enne ganse tied neet moch mitzinge biej 't Kueninklik Sjweitbergs Oratoriumkoër. Terwiel dae toch zoë sjoën kos zinge. Es d'r Sjoewe vreuger in g'n hoes of achterom get in zich eige sjtong te zinge, da bleve de luj sjtaon. Wiste die väöl dat d'r pap van d'r Feel vuer hiël lang gesjorst gewae is biej d'r koër. Direk nao d'r aorlog mot dat gebuerd ziën. Höbbe ze 'm mitein droet geflikkerd. Nae, dao is doe neet väöl biej gezag. Dat dont ze neet in Sjweitberg.

‘Dae wèt zelf waal wórom’, waor 't insigste wat gezag woërt en daste d'r wiejer de moél uever moos houte.

Mè zinge kos dae pap van d'r Feel. Operaleedjes en operettes. Italiaans en Duutsj. Kao klatsjbazel vertèlt dat d'r Feel jaore gelijje om ziéne pap nao G'n Sjprung verhoesd is. En dat is neet iërlik, want zoëwiet te weite is, klopt 't dat d'r Feel allein mer nao G'n Sjprung gong omdat hae noe einmaol politieke aspiraties haw. Die hae es Sjweitberger ambtenaer noëts kwiet kos.

[p. t.o. 16]

[p. t.o. 17]

[p. 17]

Rinkeldekinkel

- Zou me in Sjweitberg auch vastenaovend gevierd höbbe nao wat dao allemaol los is gewaes? De wets 't of de wets 't neet. Neet? Zou me in Sjweitberg zich ins good höbbe kinne laote gaon? Nnnnuh... Zou 't d'r soms aeve e bietje oet de hand geloupe ziën? Me wet 't of me wet 't neet. Mè 't is in eeder geval mer te haope dat mit die daag neet te väöl luj daakloos gewoëre zint. (Is 't noe daakloos of daakloës?) Daakloos waere is tamelich krities huujtse daags. En 't is dich zoë gebuerd! Eine kleine Seitensprung, nur ein kleines moment von Notwehrtapetenwechsel en diene - cultuurgedwonge - prins of prinses sjmiet dich 't palies oet, baus! Rinkel de kinkel, nieks mië te erve, gelök aan sjerve - es 't d'r nog waor - rinkel de kinkel: daakloos! En de versjlavinge van d'r tied kinne dich dao mit gemaak op aan drieve: rinkel de kinkel: daakloos! (Is 't noe daakloos of daakloës?)

E gans repertoir-reservoir van drugs hink os baove d'r kop... bukke! E gans repertoir-reservoir van drugs teikent oos versjlavinge. En daakloos waere is dich zoë gebuerd. Of diene drug noe oet e glaas, 'n sjpuit, e peksjke, e buuske, e tuutje, flesjke of e tillevisiekeske kump. Of dae drug noe oet roes-roes, neet sjlaope, langsjlaope, 'n dieke buesj, 'n perfecte baan, enne fonkelende wage, 'n opsjlörpende leefde of 'n verkiërde religie besjteit. Of oet gemeinsjapsgelder klauwe, water verzauwe, vervaeling gokke, belasting neppe. Daakloos kinste zië iërste 't wets! (Of is 't noe daakloës?)

In Sjweitberg kroog d'r gemeinteraod 't te kaod. Zonger sjluttel-ueverdrach sjtonge ze dao bienao op de sjtraot. Sjweitberg-naeve waore kaod en zonger maot, jao, jao, om gehannes en om gepóttentaot. Dat rijmt, dat rijmt nog, mè 'n sjporthal die laeg is komme te liegke, zaet auch get uever e volk. Welk volk liët 'n sjporthal laeg komme te liegke? En begreuf de sjportiviteit onger enne - neet mië teruk te vinge - sjtoeptiëgel?

Die brandbomfloepsjieterie is bès te begriepe. Este dich toch al de kolaere zits te sjangeneere omdat de regering d'r loën met zoëwiënig omhoëg wilt laote gaon dat e bietje vekans auch dit jaor neet good d'r vanaaf kint. Of es ze dich es oetkiëringsaafhankelikke wir ins vuer milkkow aanziën, de reinigingsrechte - nondetenaer - alwir omhoëg gont terwielste dich in de Maas ongerhand 't zondigse kestuum

[p. 18]

kins laote reinige. Es de onroerende-zaak-belasting-maffia dien flet gesjat hat esof ze aan de Rivièra liegkt in plaatsj van in Sjweitberg-Noord. Of angesj, dat dien eige versjlavinge nog altied neet onger kontrol te kriege zint. En de gemeinte alwir ins vuer d'r zoväölste kiër get oetvrit zonger nao diene kiek te vraoge. En dat alles op zoëne mistruestige dag woë dich auch nog in gen hoes alle muus oetlache omdaste mit d'r verkiërde kant vuer d'r sjpeegel sjtingt.

Jao, jao, dan is 't toch esof de ganse welt taege dich en dien kinger en dien buurvrouw en die van taegenuever en dao wir de buure van en auch Klaos van opter hook en, en, en... Dan is 't toch esof de ganse welt taege dich, taege os erm luj zit same te sjpanne! Neet da? Dat is bès te begriepe! Zoë gebuerd...

Nur ein kleines Fehlgehen, Misserfolg oder eine nichtgewollte gescheiterte Existenz... en 't is zoë wiet. Da biste daakloos en waere uever dich auch pas leedjes gemak este doëd bis. En die leedjes liëre de luj dan aan de kinger, want nieks sjonder es zingende kinger. Ao, ja... allemaol te begriepe. En is 't dich dan zoë en höbste ongelökkig auch nog toevallig 'n laeg flesj, enne loetspoemel, eh, poetsloemel en get benzien onger de veut dan zaeste vuer 't gerich dat die brandbom gemak waor iërste d'r erg in haws. Of dien opgestuekde buurvrouw zaet dat. Of die häöre man of dae van taegenuever of d'r zoën van Klaos opter hook, dae vuer zoëget zelf te bang is en zich dao dus d'r miensj neet vuer veult. Dan ister - zulle ze bie 't gerich motte begriepe - 'n brandbom gemak iërste 't wets. En die sjtik me dan auch aan. Of de buurvrouw of die haäöre man of dae van taegenuever of die erm vrouw van Klaos. Mè dat sjpul kint in de heng verrekdes heit waere en da is me onger hand bliej dat me sjmiet. Nao de sjporthal in Noord, woë me toch al kaod op is, da sjmiet me (wie dae man 't paerd sjtampt es he mirkt dat zien vrouw mit d'r milkboer in ge bed liekt).

't Is te begriepe. Alles is te begriepe, zegke ze. Welk volk liët trouwes 'n sjporthal laeg komme te liegke? Welk volk hat allein mer oug vuer wat wiet weg is of doëd en begrave? Mè 't ergste is dat 't te sjnappe is. Nae dat is neet 't ergste. 't Is te sjnappe en auch d'r angs van d'r gemeinteraod die daorom dèk lokasies vingt woë ze d'r zelf geine lasvan zulle höbbe. Al kinste natuurlik in de sjiekste winkelsjtraot nog e

[p. 19]

blauw oug gehawwe kriege. Wat enne angs toch! Wat enne ongereigelde angs! Neet dat 't te sjnappe is, is 't ergste, mè dat me 't d'r neet mit eins kint ziën!

Rinkel de kinkel: daakloos. Is mich gelökkig nog noëts ueverkomme. Rinkel de kinkel: daakloos. En die mich leef zint auch nog neet. Rinkel de kinkel, rinkel de kinkel, rinkel de kinkel. Missjien ister nog plaatsj onger de brökke? Rinkel de kinkel: daakloos. Of op de Mookerhei? Rinkel de kinkel: Daakloos. Of Rottummerplaat? Rinkel de kinkel... Of in Mestreech in d'r Sint Pietersberg? Rinkel de kinkel... de kinkel... Jao, in Sjweitberg is gewoon vastenaovend gevierd.

En klaor is vaerdig op de vot!