Platbook 3. Gebaorte en doeëd

[p. 34]

Leonne Cramers, Gelaen
Ich dènk aan dich

wie die reuëskes mit 't nachnaat nog d'rop
pritsj de kroanblaedjes aopevawwe
de zón geuf wermde
wie dien henj
wie ze wirke en mich vashawte

roaj reuëskes
road van dien bakkes en diene móndj

ouch ós reuëskes höbbe däöres
vertèlle van ós laeve
dat jaor veur jaor
soms óngemerk
in de pungel geit

óm dat alles biejein te hawte
dich
zoa wie-s te waors
was te zags en was te deegs
die henj, dae móndj en dich
dien leefde en laeve

ligke hie tweë roaj reuëskes
in e deuëske