De warachtighe historie van doctor Johannes Faustus

Een disputatie van der helle ende van hare speloncke.

DOctor Faustus (ghelijck men te seggen pleecht), die droomde van de helle. Daerop dat hy zijnen boosen gheest vraechde naer de substancie, nae de plaetse ende naer het schepsel der voorszeyde hellen, ende wattet voor een maniere van plaetse wesen mochte. Den gheest doet hem daervan dese verclaringhe, namelick dat soo haest als zijn heere Lucifer tot den val ghecomen was, hem de helle bereydt was, welcke daer is een duysterheyt. Daerin dat den duyvel Lucifer met een keten ghebonden light, verstooten ende overgegeven is, dewelcke² hy tot een oordeel behouden sal, waerinne niet anders ghevonden en wort als eenen grooten nevel, vyer, solfer, peck ende meer ander gestanck. ‘Voorts en connen wy duyvels anders niet weten’, seyde hy, ‘hoe, ofte op wat maniere, de helle geschapen is, noch hoe datse van Godt ghefondeert ende ghebout is, want sy en heeft noch eynde, noch gront. Ende dit is al tghene dat ick u hiervan weet te segghen, daerby dat ickt late blijven.’

2 nl. de hel