Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
AuteursrechtvrijOp die vvijse Adam vvas een verloren man. etc.O broeders ghedenct het groot ellent
Van die zielen in het helsche torment
Dat sy eewech daer moeten lijden
Och hoe lanc is eeuwich sonder ent
Daer nimmermeer coemt verblijden.
Dese plaetse die is al onder der eert
Soo alsmen ons voor die waerheyt leert
Eenen poel seer vreesselycken,
Daer Lucefer, met den sijnen verkeert
Wie en soude hem hier niet af verschricken.
Daer regneert den eeuwighen doot
Door veel der handen tormenten groot
Die den Duyuel daer gaet bedrieuen
Door zyn wreetheyt, ende boosheyt snoot
Die hier in sonden volherdich blieuen.
Sy zyn aldaer in grooten ghetal
En haer macht die ouerwint daer al
Soo gaen sy daer domineeren,
Ouer alle die daer comen sal,
En haer hier niet van sonden keeren
Sy thoonen ouer alsulcken haer macht
Die haer leuen hier hebben ouer gebracht
In sonden, ende quaet leuen
En hebben Godt, noch syn geboden niet geacht
Of in haer ongeloof zijn ghebleuen.
Seer dickwils vermaent ons die schriftuier
Van dit grouwelyck helsche vuier
Dat zeer heet is bouen maten
| |
[pagina 155]
| |
Ende oock eewich is in geduier
Waer wt niemant wort ghelaten.
Hier wort die verdoemde ziele gheleyt
Nae dat zy wt haer lichaem scheyt
Wort zy hier al in ghesmeten,
In desen put vol donckerheyt
Daer den worm haer eewich sal eeten.
Die consientie die daer eewich knaecht
Om dat zy van God zoo is veriaecht
Nae wiens beelt zy was gheschapen
En mits haer die boosheyt heeft behaecht
Soo heeft die helle haer doen rapen.
Int oordeel alsmen weder op sal staen
En die ziel in haer lichaem sal zyn ghegaen
Oock haer oordeel zal hebben ontfanghen
Soo zal die helle open zyn ghedaen
En besluiten ziel ende lichaem stranghen.
Daer sullen zy aldus te wercke gaen
Met die houerdije hebben ghedaen
Dese zalmen te samen doen binden
Den gierighen, ende onchuyschen daer aen
Die salmen dan mede wel vinden.
Den oproerighen, ende dootslaegers coen
Salmen mede oock alzoo doen
Den Dronckaerts salmen oock zoo packen
Met swauel, en Sulpher salmen haer voen
En doense al by malcander smaken.
Daer salmen dan hooren seer groot getier
Die hem nu vult met wijn ende bier
Wat anders sal hy daer smaecken
Den knagenden worm, en t’helsche vier
Daer hy moet branden, ende blaecken.
Alle sondaers sullen daer nae aduenant
Ontfanghen pijne wt den helschen brant
Nae de sonden van haer bedreuen
Die sal al nae zyn rechtueerdich hant
Een yder het zijne doen gheuen.
| |
[pagina 156]
| |
Daer salmen sien het ooghen gheschrey
Van veele volcken menichderley
knerstanden sal men oock hooren,
Och lacy, hoe bang ende wee is my
Sal daer vervullen haer ooren
Dit sullen altoos die liedekens zyn
Van dien ghesonghen int helsche pijn
Dat zal daer eeuwich gaen dueren
Oock het deruen van Gods claer aenschijn
Sal haer pijne doen wtschueren.
Men sal daer ruycken sulcken stanck
Die daer sal duieren eeuwich lanck
Die wy hier niet connen verdraghen
Met den clagenden droeuigen sanck
Die niemant sal connen veriaghen.
Beminde laet ons dit zyn een schrick
Want Christus die heeft ons al gelyck
Van dese pijne willen bewaren
Man en vrouw, arm, ende rijck
Wil hy onder zyn wiecken vergaren.
Wy lesen int Euangelie claer
Van een rijcken mensch datter waer
Die hier zeer lecker ginck eeten
Oock hem costelijck becleede daer
Maer worde in der hellen ghesmeten.
Als hy nu in dese tormenten lach
En Abraham van verre sach
Soo begonste hy daer te spreecken
Ick bidde of Lazarus comen mach
En zyn vinger in het water doen steecken.
Op dat hy zoo doen coelen myn tong
Dit was het liedeken dat hy doen song
Maer ten mochte hem niet ghebueren
Dus raede ick v out, ende iong,
Dat ghy nu wel hier siet te vueren.
Een dropel waters wort daer ontseyt
Maer moeten lyden inder eewicheyt
| |
[pagina 157]
| |
Och laet ons nu hier op waecken
Siet dat ghy nu een goet leuen leyt
So zult ghy daer niet gheraecken
Wilt ghy dese ellendige plaetse ontgaen
So moet ghy int Catholyck geloue staen
Datmen altyts heeft doen leeren,
De nieuwe seckten hangt toch niet aen
Maer doet v daer verde afkeeren
Vreest Godt, en hout zyn gheboden wel
Leeft heylich tot v eynde na zyn beuel
Wilt zyn Dienaers ghehoorsaemheyt geuen
Soo zult ghy ontcomen dese hel
En inden hemel naemaelsleuen. Amen.
|
|