Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
Auteursrechtvrij
[pagina 147]
| |
Op die vvijse, Op v betrouvv ick Heere. etc.O mensch en wilt niet houerdich wesen
Al zyt gy na Gods beelt gemaekt
Want alzo wy daer oock lesen,Ga naar margenoot+
Soo heeft ons alle Gods toorn gheraecktGa naar margenoot+
Om dat ons ouders hadden gesmaecktGa naar margenoot+
Die vrucht haer van Godt verboden
Soo heeft Godt haer doen verclaert
Dat zy souden veranderen in aert
En haer sonden die deden haer dooden
Alle Coninghen, ende alle Propheten
Hoe wijs, hoe rijck, ende valiant
Die doot die heefse al neder ghesmeten
Oock die schoonste diemen vant
Absalon den frayen quant
Oock Salomon zynde vol wijsheden
Dese zyn al ouer langhe doot,
Met Goliadth den Ruese groot
En oock Dauidt diet hem deden
Laet ons oock wat achterwaerts keeren
Tot ons Heeren vrienden al,
Maria Gods moeder vol eeren
Met die twaelf Apostels int ghetal
Paulus men mede niet vinden zal
Noch oock Iohannes den Dooper
Dese zijn al op dien reys
In ghegaen den wech van alle vleys
Dat is een ghestadighen looper
Die sentencie die daer eens is ghegeuen
In het beginsel naer onse misdaet.
Die is altoos waer ghebleuen,
Alzoo dat niemant den doot ontgaet
Of zy wel leuen ofte quaet
Die zielen t’lichaem moet eens scheyden
| |
[pagina 148]
| |
Dat is den alderbesten raet,
Darmen den eeuwighen doot ontgaet
Laet ons desen wech doen bereyden.
Denckt myn beminde wtvercoren
Hoe vreesselijck dat die doot coemt an
Ouer alle die hier zyn gebooren
Het zy vrouwe, oft oock man,
Niemant hem ontlopen can
Hy clopt voor alle dueren
Ionck, oudt, arm oft rijck
Hy doetse alle ghelyck.
Met gewelt wt deser werelt schueren.
Al zyt ghy hier sterck sonder vresen
Ghesont, ende wel te pas,
Ghedenckt het zal haest anders wesen
Och of dit in v herte was
Ghy soudt v bereyden ras,
En verbeyden tot allen uren
V sentencie van Godt den Heer
Door vreese, ende beuen zeer
Die daer eeuwelycken zal dueren.
Diet hoe geweldich ons de doot cont steecken
Met zyn pijlen zeer bitter ende wreedt
Hy beneemt ons zeer haest het spreecken
Ons ghesicht hy oock raet toe weet
Het verstant criecht oock sulcken beedt
Dat al ons vyf sinnen faelgeeren
Dit is den bode van het endt,
Want het lichaem wort nu gheschent
Door die eerste sentencie des Heeren
O mensch ghy gaet nv al zoo verheuen
Met alle houerdicheyt ende pracht
Ghy moet zeer haest reeckenschap geuen
Van al v woort, tot het ghedacht
Dit zal v al worden voor gebracht
Denckt hoe dat ghy aldaer sult vresen
Als v wort geseyt zeer knap,
| |
[pagina 149]
| |
Coemt ende Gheeft hier reeckenschap
Ghy en sult niet meer Rentmeester wesen
Als die siele nu aldus haer scheyden
Wt haer lichaem dat zy heeft bewoont
Soo staen daer boden nae te verbeyden
En zy wert voor den rechter verthoont
Daer sy nae haer wercken wort gheloont
Het sy wel, oft qualick te vaeren
Is syhier niet wel ghepurgiert
Soo wort sy nae het vuier ghestuiert
Om aldaer wel, ende suyuer te claeren.
Maer wort ghy O ziele beuonden
In ongheloof opstinaedt
Oft oock in groote sonden,
Weet dat ghy dan ter Hellen gaet
Och het is dan al te laet,
Daer en helpt roepen, ofte kermen
Maer wilt ghy dese pijne ontgaen
Soo maeckt hier wel met Godt te staen
Hy zal v dan seer wel ontfermen.
Als v ziele dan nu is gheuaren
In d’ander werelt onbekent
Niet voor twintich oft dertich iaren
Maer voor eewelijck zonder endt
Het zy in glorie ofte torment
So draechtmen het lichaem ten graue
Daer wort het in d’aerde bedeckt
Met een wit cleet om betreckt
En die vrienden ontfangen die haue.
Daer worden wy inder aerden ghesmeten
Ende van niemant meer gesien
Oock zeer haest worden wy vergeten
En met der aerden worden wy gemien
Och laet ons houerdicheyt vlien
Ende dit alhier nu wel versinnen
Ende God dienen nacht ende dach
Met al dat onse hant vermach
| |
[pagina 150]
| |
Laet ons malcanderen oock beminnen
Oorloof die nv al hier gaet proncken
Siet wat ghy haest worden sult,
Oock die v dickwils vol hebt gedroncken
En met alle leckernije vervult,
Ghy sult haest betalen Adams schult
Wilt dit zeer wel beuroeden,
Ghy sult met uwen lichaem vet
Onder der aerden worden ghesedt
Daer ghy wormen, en zerpenten sult voeden.
|
|