Nieu liedt-boecxken inhoudende verscheyden liedekens op die principale feest-daghen ende ander heylighe daghen vanden jaere
(1614)–Rumoldus Batavus–
Auteursrechtvrijop die wijse. Ontwaeckt nu Israel.Ghy dochter van Syon, doet op v ooren
Want v zalicheyt die is nu voorhant
Daer ons Esaias af seyde te vooren
Die is nu ghecomen tot t’viants schant
De reynste Maget, diemen oyt vant
Is huyden gheboren dat is ghewis,
Tot des vyants schade, want door haren zade
Den draeck zijn hooft vertreden is.
Wt Iessen stamme, is zy ghecomen
Eenen roede wt Dauids zaedt,
Daer wt soude wassen eenen bloeme
Die alle bloemen te bouen gaet,
Een magets Soone zeer delicaet
Op hem zal rusten Gods gheest voorwis
Tot des vyants schaede, want door haren zade
Den draeck sijn hooft vertreden is
Dit zuyuer maechdeken wtvercooren
| |
[pagina 93]
| |
Maria die schoonste diemen vant,
Was van Ioachim, ende Anna ghebooren
De heylichste menschen int Ioodtsche lant
Die godt daer dienden, en vreesden want
Alzulcke menschen verkiest Godt wis
Tot des vyants schade, want door haeren zade
Den draeck zijn hooft vertreden is.
Laet ons dan God den Heere dancken
Dat hy ons sulcke vruchten gheeft,
Voorts ghecomen wt Abrahams rancken
Als Godt te voren ghesproocken heeft
Hy heeft ons ghebenedijt, dat is ghewis
Tot des vyants schade, want door haren zade
Den draeck zijn hooft vertreden is.
Ioachim, ende Anna seer hooch verheuen
Looft doch den Heere tot alder tijt,
Want God heeft v dese vruchte ghegeuen
Daer al die werelt door is verblijt,
In haer was gansch gheen smet te niet
God heeft haer ghesuyuert dat is gewis
Tot des vyants schade, want door haeren sade
Den draeck zijn hooft vertreden is.
O Moeder Gods vol bermherticheden
Weest by v Soone ons Aduocaet
Want dat Adam, ende Eua ons deden
Hebt ghy ghevoet met uwen zaet,
Dat ghy ontfingt door v vryen raedt
Nae Gods belieuen, dat is ghewis
Tot des vyants schade, want door haren sade
Den draeck zyn hoofd vertreden is.
|
|