Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Phillips die II, aertshertoge van Oestenrijc, die XXIX graef van Hollant, Zelant ende Vrieslant.
Dat II capitel.

Phillips, die twede van dyer namen, hertoge Maximiliaens van Oestenrijke ende vrouwe Marien van Bourgondien enige soen, en was mer IIII jaer out doen sijn moeder starf int jaer M CCCC LXXXII; waerom dat bi consente ende wille van den landen die doerluchtige prince ende hoge geboren vorst Maximiliaen⁴⁴⁰, aertshertoch van Oestenrijc, de landen als voecht van sijn soens wegen in groter perturbacien ende commocien, overmits die twedracht ende partien der steden heft geregeert, totdat men screef M CCCC XCIIII, in welcke voornoemde jaren dese Philips geworden is aertshertoch van Oestenrijc, hertoge van Bourgondien, van Lottringen, van Brabant, van Stier, van Carinten, van Limburch, van Lutsenburch ende van Ghelre, graef van Vlaenderen, van Habspurch, van Phiert, van Kyburch, van Bourgondien, van Artoys, palatijn van Henegouwen, van Namen, van Zutphen, marcgraef des Heilich Rijcx⁴⁴¹ ende Burgau, lantgraef van Elsaten, here van Windesmarc, Portenau,

440 Maxiliaen AB.

441 aldus C; Rijc AB.

[p. 413v]

Salins ende van Mechelen, ende nu dye XXIX grave van Hollant, Zeelant ende here van Vrieslant. Als die Roomsche Coninc Maximiliaen, sijn vader, lange tijt absent geweest hadde van desen landen, so quam hi neder mit sijnder huysvrouwen des hertogen dochter van Meylanen, eerst in den lande van Brabant mit enen groten state van vorsten, princen, prelaten ende edelen. Ende here Phillips, sijn soen, mit vrouwe Margriete, sijn suster, reysden haren vader in dat gemoete tot in der stede van Maestricht. Vandaen quamen si mit allen den state te Lovene in der stede. Als si nu tot Loeven ghecomen waren, so wert daer grote gereetscap gemaect te ontfangen; ende wert aldaer gehult ende ontfangen van allen den steden van tgehele hertoechdoms wegen van Brabant, out sijnde XVI jaren; tot Antwerpen van tmarcgraefscaps wegen des Heiligen Rijcs; tot Sinte Gheertenberge wert hi gehult ende ontfangen den XII dach van December van tgraefscaps wegen van Hollant; tot Reimerswale van tghehele lants wegen van Zeelant. Ende alle die steden van elcx lants wegen quamen ter plecken voornoemt ter huldinge van den prince in allen scine, of hi in persone in elke stede selver hadde geweest. Ende cortelic hierna is hi in Henegouwen gehult geweest, ende daerna in Vlaenderen.