Hoe dat die Kenemers, dye men doe noemde tCasenbroot volck mit groter macht voir Haerlem quamen, ende hoe si inghelaten worden, dair veel leets of quam.
Dat LXXVI capitel.
In den jaer XCII, den derden dach in meye, als des Heylich Cruys dach, des avonts omtrent VIII uren, sijn die van Alcmaer mit zommighe uut Noort-Hollant voir dye stadt van Haerlem ghecomen mit een grote menichte, want si terstont nadat de stadthouder omtrent Alcmer geweest hadde, weder van nyewes een vergaderinge van volck maecten, verduchtende datGa naar voetnoot419 se noch overvallen souden wordenGa naar voetnoot420 ende begheerden binnen die stat te wesen. Die overste ende regenten van der stat mitten rijcdomme ende vroetscap concludeerden ende sloten eendrachtelyc dat men se om alle best willen niet inlaten en soude, om de stadt in ghenen rebellicheit noch in meerder last te brenghen; ende dit wert dus opentlick van der stadthuys ghecondicht. Ende die heren hilden spraeck mit hen buten der stede, ende lieten se dairbuten bliven ende en wouden se niet inne laten. Mer terstont als die heren binnen waren ende die poorten gesloten hadden, so sijn enige gecomen van binnen ende sloegen de Cruyspoorte mit macht op, ende lieten incomen alle die incomen wouden. Ende dese Kenemers of tCasenbrootsvolc hebben terstont groot anval ghecreghen van die van binnen, want men altijt veel luden vint die tot een qualic varen ende destructye van eender goeder stadt wel bereyt ende geneycht sijn, ende quamen gedringen na de marct toe, dair een groten hoep van den besten ende oversten van der stat vergadert stonden, ende sijn zommige van desen uut vresen, niet wetende wair te vlien, op dat stadthuys gelopen ende sloten dat vast na hem toe. Die ander dit siende, liepen na dat stathuys toe, ende sloegen die doren mit bylen ende hameren an stucken ende scoten mit clovers ende worpen so vreesteliken mit stenen dat niemant een hoeft uutsteken en dorst, ende deden veel weers om op dat stadthuys te wesen. De ander omtrent XL dairop wesende dit merkende ende siende dat se gheen weer by hem en hadden, ende dat hem niement te ontset ende hulpe en quam, hebben si begeert sprake mit hen te houden ende hen op geleye ende ghelove behouden tlijfs dat huys te openen, dair si in consenteerden ende beloofden hen niet te misdoen. Ende in deser manyeren ende op goeder geloven deden si dat stathuys open, dair si terstont mit groter menichten opliepen ende vreesden veel poorters doot te slaen, ende sloegen mit groter nydicheit ende verwoetheit ter doot Claes van Ruven, scout van der stadt van Haerlem, ende een scepen van der stat, genoemt Peter Thomaszoen, ende sinen broeder Andries Thomassoen, ende was des avonts tusschenGa naar voetnoot421 VIII ende IX uren. Ende des nachts hebben die zommige, ende waren meest van binnen der stat woenachtich, veel onstuers ende woesticheit bedreven, ende liepen in der goeder luden husen ende maectent seer leliken, slaende in stucken alle dat si binnen den husen vonden van bedden, stoelen ende bancken, ende hebbent oec uuten husen ghenomen ende thuyswertGa naar voetnoot422 gebrocht al dat hen diende; der luden brieven gescoert ende die zegelen ofgetogen, ende grote onprofitelike scaden ghedaen. Ende desgelijcs op datGa naar voetnoot423 stathuys, dair si al die sloten op slogen, oecGa naar voetnoot424 die tresorijers camer ende der weeskinderen kiste, dair si veel scade van brieven, quitancien, registeren ende in anderen dingen deden, dat si mit allen recht ende reden, indient yemantGa naar voetnoot425 van buten hadde ghedaen ende bedreven ghekeert souden hebben; alsoe, dat niement van namen binnen sijn selfs huse bliven en dorste om der groter onsturicheyts ende verwoetheits willen, ende hebben hem verborghen ghehadt tottes anderen dages, dat die hetten over was. Ende des anderen dages worden IIII capiteinen gemaect, die elcxs XXX mannen onder hem hadden om voirt meerGa naar voetnoot426 alle quaet ende oploep te bescutten, also datter gecondicht wert, wie dat verborghen was, dat hi te voirscijn comen soude, dat men se geleyen soude. Oec werter ghecondicht wien datter enige goeden genomen, geroeft ende geplondert hadde, dat hy dye te voirscijn soude brenghen, op die verboernis van sijn lijf. Ende daer wert een galghe op tsant gheset om die quaden ende rebellen te castien.
Auteursrechtelijk beschermd