Hoe die hertoge van Cloucester versceyden bi sentencie des paeus van vrou Jacobe.
Dat XXXIII capitel.
Opten XXVII dach van januario, int selve jaer, hebben dye cardinalen van Ursine ende Venegijen als arbitreurs ende rechters van der saken des huwelicxs tusschen hertoge Jan van Brabant ende vrou Jacobe bi goetduncken ende avyse van den anderen cardinalen bi eenre uutsprake gewesen, dat vrou Jacobe onbehoerlic gescheiden was van hertoge Jans geselscappe, haren getrouden man, ende hoewel dat si mits desen den hertoge weder gerestitueert soude sijn, soe ordineerden si nochtans om redelicke saken hen dairtoe porrende dat si totten uuterlike vonnesse van der princepaelder saken bewaert ende gehouden soude worden op haren coste bij hertoge Amedeus van Savoeyen, die hertoge Jan van Brabant ende oec haer van maechscape ten derde lede bestont ende van swagerscappe ten tweden lede. Ende als die hertoge van Cloucester dese sentencie vernam, soe keerde hi hem van vrou Jacobe, ende begaf se, ende heeft een ander wijf getrout in Engelant. Die hertoge van Brabant dit vonnesse verhorende, was hi des wel gevreet in sijnre consciencien; mer vrou Jacobe was qualijc te vreden, ende si en woude in des hertogen handen van Savoyen niet comen. Ende si hadde lyever in des hertogen handen geweest van Brabant, mer hi en woude se niet hebben, seggende dat hyt vonnesse onderhouden woude; ende aldus is si tot Scoenhoven ende ter Goude in Hollant ghebleven. Nochtans so behilt hertoghe Philips alle tregiment ende administracij van den landen van Hollant, Zeelant ende Vrieslant tegen haer.
Auteursrechtelijk beschermd