Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat here Floris, biscop van Uutrecht, oflivich worde.
Dat XL capitel.

In den jare Ons Heren M CCC ende XCIII, opten IIII dach van Aprille, ende was doe die Heilige Goede Vridach, ter wilen dat men dat Heilige Ambocht in der kercken dede, omtrent IX uren, doen sceide van deser werlt ende ruste in den Here here Floris van Wevelichoven, biscop van Uutrecht, in de stede van Hardenberch, gelegen int lant van Overysel, als hy dat bisdom van Uutrecht mit groter eren XIII jaer lang ende V maenden hadde berecht. Dat welcke bisdom hi verladen vant mit vele sculden, ende was mit allen seere⁴⁵⁷ verarmt; mer hi heeftet sine nacomelinghe

457 seert AB.

[p. 232r]

gelaten overvloedich van rijcdomme. Ende als dese eerwaerdige biscop in zijn bedde sieck lach, quamen tot hem sine vrienden ende magen van sinen bloede, ende begeerden van den biscop versien te worden mit tijtlike goeden ende gaven. Denwelcken die goedertieren vader antwoerde ende seide: 'Mijn alreliefste kinderen ende vrienden, datgheen dat ghi overmits u diensten van mij hebt verdient, dat heb ic u doechdelic ende wel gheloont⁴⁵⁸ ende betaelt, ende dat ick u behouden mijne consciencie gedocht hebbe te geven, dat hebbe ic u te voren gegeven.' Ende hi dede terstont bi hem comen sine offiecieren ende dienres, ende bewees hem den scat dair si sine sculden mede souden betalen; ende seide voirt dat alsulcke goeden als hi meer hadde, die waren hem angecomen van Sinte Martijns goeden. Ende daerom nam hi voir hem, dat hi dieselfde goeden Sinte Martijn ende sinen successoer ende navolger laten wilde. Dit geseit wesende dede hi sine vrienden ende magen van den huyse gaen, ende beval sinen casteleyn dat hi die niet en liet weder opten huyse comen, opdat si hem niet meer bidden en souden; want hi en woude sijn bisdom niet⁴⁵⁹ beswaren om sine vrienden ende magen wille. Daerna sende hi tot Henric van Zueren, castelein opt huys te Vollenhoef, ende an Evert van Esse, castelein van der Horst, ende tot andere casteleynen, officieren ende dienres, dat si haer sloten ende huysen des Stichts wel bewaren souden tot behoef des toecomenden biscops. Dese eerbare here heeft vele goede dingen gedaen in den Stichte ende lande van Uutrecht, want in die stede van Hardenberch dede hi een scoen casteel maken mit enen groten stenen toorne, mit een coninclike saele ende slaepcamer, ende mit een stallage van CC paerden. Hi dede oec repareren ende vermaken alle die sloten ende huysen in den Oversticht ende Nedersticht, als Vollenhoef, Horst, Stoutenburch, Vredelant ende Eembrugge, die mit allen sere vervallen waren, want si in menigen jaren nyet versien en waren. Hi liet alle sine sloten des Stichts sinen nacomelingen vry ende ombecommert, wel bewaert mit provande ende van als des men daerop behoeflijc was; ende dat ghemeen Sticht liet hi bisonder in goeden vrede. Sijn lichaem wort gevoert van Hardenberch tot in der stat van Uutrecht, ende worde aldaer begraven in dye Cathedrael hoeftkercke voer dat Hoge Outaer, mit groten wenen ende suchten sijnre vrienden.

458 gehloont AB.

459 aldus C; ontbr. AB.