Van den strijt tusschen der keyserinnen ende haren soen.
Dat XV capitel.
Die keiserinne, als si dit verhoerde, was si uutermaten seer gram op haren zoen ende die heren ende steden van Hollant, ende si screef hem hoe hi soe koen ende vermetel was, dat hi hem onderwant haerre heerlycheit. Hy screef haer weder, dat si sine waer, want si had se hem ghegeven. Datwelke hi niet bewisen en mochte mit tugen, noch brieven; ende als si sach dat hi hem des niet ofstaen en woude, heeft si vergadert een uutgelesen hoop volcs van wapenen, om te strijden tegen haer eygen soen. Ende die coninginne van Engelant sende haer suster, der keyserinne, een scoen heer van volc, uutghesocht ende geleert in striden ende oerlogen. Als nu elc zijn volc hadde bereit om te striden, is de keyserinne mit een groten hoop van scepen, wèl toegemaect om te vechten, mit blinckende bannieren, mit trompetten; ende gecomen in Walcheren bi der stede van der Vere. Hertoge willem heeft daertegen vergadert uut Hollant veel volcks, ende is tscepe gegaen, ende is mit heercracht gecomen in Zeelant om tegen sijn eygen moeder te striden. Dese twe an malkanderen comende, wart daer mit allen seer gevochten; ende an beyden siden bleven veel doden, ende daer verdrencter mit allen veel. Ende int teinde wan die keyserinne den strijt, ende hadde victorie van haer vianden; ende hertoge Willem die ontquam, ende hi vluchte in Hollant. Ende dit gesciede int jaer M III C LI.
Auteursrechtelijk beschermd