Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die pertien alreeerst in Hollant

[p. 213r]

quamen.
Dat XIII capitel.

Int⁴¹⁶ jaer M III C L, doen stonden op in Hollant twe partien, daer den lande van Hollant⁴¹⁷ doen tertijt ende hier namaels over menich jaer groot ongeval, verdriet ende jammer of quam, tot destructie ende verdervinge des gehelen lants. Die luden van der eender partye namen haren naem van een zeevische, geheten een Cabbeljau, daerin te verstaen was, dat also dese vissche een verslinder is van andere visschen des sees, also souden de luden van deser partie ende sijde verslinden ende verdrucken die andere, haer adversanten, ende dese hieten Cabbeljau. Die andere luden van der partie hyeten hem Hoeken, nemende haren naem van enen hoec; want die hoec den vissche te vangen pleget. Van der Cabbeljauscher partie waren die overste here Jan van Arkel, des byscops van Uutrechts vader; here Jan van Egmont; here Gerrit van Eemskerc mit meer andere edelen heren ende knechten. Van der Hoecxs partie waren⁴¹⁸ die overste heren Dirc van Brederoede; here Phillips, burchgrave van Leiden ende here van Wassener⁴¹⁹; here Jan van der Lecke ende Polanen; here Jacop van Binchorst, mit meer andere heren ridderen ende sciltknechten. O verdoemlic venyn, ghesayet ende gespreyt van den duvel onder den inwoenres des lants van⁴²⁰ Hollant. Nu vloyen ende spreiden hem die partien, doer diewelcke dat gemeen goet alheel gedestrueert ende te nyete wert gemaect. Alle rechtvaerdicheit wert onder die voeten geworpen ende vertreden, want bi deser partien bi lancheit van tiden quamen in Hollant toerne, kivinghe, hat ende nijt, viantscap, logentalen, valscheit, blasphemie, dootslagen, verraderie, brantstichtinge, tirannicheden, twedracht, verdruckinge der onnoselen, verwoestinge der steden ende dorpen, afterclappinghe, quade anbrenginge, onrechtverdicheden, verpachtinge der diensten dye onbequaem waren, der maechden ende vrouwen vercrachtinge, der Sacramenten der Heiliger Kerken versmadinge, der kerken ende der heyligher⁴²¹ plaetsen violeringe, ende ten einde berovynghe ende destructie des gehele provincie ende lants van Hollant. Want als ons Here seit ende sinte Lucas bescrijft in sijn XI capitel: Alle riken in hemselven gedeelt, sullen vergaen; ende dat een huys sal vallen opt ander. Ende Salustius scrijft int boec van den strijt, die die Romeinen hadden tegen Jugurtam aldus: Cleine dingen wassen mits eendrachticheyt; ende mits twedracht so vergaen grote dingen. Ende Tullius seit int Boec der vrientscappen: O, wat huys staet daer soe vast; wat stat so wel gefondeert, die niet met hat ende nijt ende mits twedracht mogen vergaen. Als men sien ende mercken mach in die destructie des stads van Romen, van Bovonien, van Genuen, ende meer ander; waerom sijn si destrueert ende vergaen, dan alleen doer twedracht ende partye, daer ons God of verlossen wil. Etcetera.

416 Int Int AB.

417 Hollan AB.

418 varen AB.

419 Vassener AB.

420 nan AB.

421 heyliher AB.