Van die rebelheit des casteleyns in Hagensteyn tegen den biscop.
Dat XXVIII capitel.
Des jaers daeran van XXXII, was een casteleyn op dat huys te Haghensteyn, gheheten Henryck. Dese quam al by wilen ghevaren over dye Lecke, berovende ende scattende die ondersaten des biscops van Uutrecht. Johan die biscop bat herteliken den goeden grave Willem dat hi hem bistaen wilde ende helpen hem dyt grote ghewelt ende onrecht keren, want hy seer daerin was ghestoert, ende en mochtes alleen nyet wreken. Ende die grave sende Willem Kuser, baelju van Rynlant, mit een deel volcs uut Waterlant ende Aemstelrelant, daer hem die biscop an versaemde mit sine ridderen, jonckeren, burgheren ende ander sine ondersaten van den dorpen, ende voeren weder over die Lecke, ende verbranden alle die husen ende woninghen haerre vianden, ende namen weder wraec van hem. Ende sijn weder myt groter eren ende love onghescent elc tot sinen lande ghereyst.
Auteursrechtelijk beschermd