Van tanderde belegge der stede van Zijrixze ende striden.
Dat XIIII capitel.
Dit aldus gesciet wesende, is Ghwije van Vlaenderen sere verblijt geweest van den zege die die Vlamingen van den Zelanders hadden gehat, ende heeft terstont zijn volck van wapenen vergadert, ende is crachteliken weder gaen legghen voer Zijrixzee, saterdages voer Palmen tot des woonsdaghes na Paesschen; ende siende dat hi niet en vorderde, heeft hi dat belegge opgebroken, ende is gevaren over die Mase, ende heeft met heer Jan van Renesse heel Noort-Hollant ingewonnen ende onder sine dominacie gebroecht, tot Haerlem toe, ende nam enige poorteren van Leyden ende Delft, ende brocht se ter Goude; ende hy sette heer Claes van Cats, castellein, tot Scoenhoven. Hyerenboven quam hertoech Jan van Brabant ende wan de stede van Sinte Geertenbeerghe, myt heel Zuyt-Hollant, sonder Dordrecht alleen; ende beleide Dordrecht X daghen lang, ende bestormde de stede seer met menige assaulte ende vierighe ghescutte, ende verbrande alsoe een groot deel van der stede. Die poorters stelden hem vromelicken ter weer, bescermende die stede van den brande, ende sijn uutghegaen mit heer Claes van Putten ende Strenen. Ende hebben den hertoghe met alle sijn volck uut Suyt-Hollant verdreven ende verjaecht. Ende sijn se naegevolcht, vanghende ende slaende, ende vele dorpen verbarnende, tot des sHertoghenbosschen toe. Ende in versmaetheit des hertoghen, scoten si dat vier in die stede, ende verbranden een groot stuc van der stede, ende namen enen groten roef met hem. Ende sijn weder myt groter eren ende triumphen ghecomen tot Sinte Geertenberghe, ende verdreven alle dye Brabanderen uuter stede, ende quamen weder tot Dordrecht. Dit gheschiet wesende, hebben si een nyewe vergaderinghe van volck ghemaect, ende sijn ghetogen met heer Claes van Puten, ende hebben enen groten strijt gehat tot Yselmonde, teghen Ghwije van Vlaenderen, daer wel twe dusent Vlaminghen bleven versleghen. Ende Gwije is nauwelic mitten live ontghaen.
Auteursrechtelijk beschermd