Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van joncheer Jan van Hollant ende van zijn voechden, ende was die XVII grave van Hollant, Zeelant ende heer van Vrieslant.
Dat II capitel.

[p. 185r]

Als nu dye edele grave Floris dus jammerlicken, als voerseit is, geslagen ende vermoort waer, so is zijn soen, jonchere Johan, geworden die XVII grave van Hollant, Zeelant ende heer van Vrieslant. Ende want hi noch bi zijns wijfs vader, den coninc van Engelant, hem onthoudende was, so is gecomen grave Dirck van Cleve, ende heeft de voechdie van Noort-Hollant angenomen; ende daertegen is gecomen Ghije, graef Jan van Henegouwens broeder, thesaurijer van Ludick, ende nam an de voechdie van Suyt-Hollant, ende bleef wonen tot Sinte Geertenberge; van welker twedracht een groot rumoer opgestaen is in desen landen van Hollant; ende dat volc is aldus een wijl tijts versceiden ende van malcander ghedeelt geweest, sittende sonder here ende rechter. Dese voerseide grave Jan van Henegouwen ende Ghye zijn broeder waren kinderen ende zonen graef Jans van Avenes, graef van Henegouwen ende Alijt zijns wijfs, coninc Willems suster, vader des verslegen grave Floris. Aldus waren si graef Floris neven van haerre moeders weghen.