Hoe dat die twe castelen Vredelant ende Montfoert gewonnen worden.
Dat XVIII capittel.
Die biscop ende ecclesie van Uutrecht zijn gecomen tot grave Floris, clagende den groten overlast ende onrecht dat hem gesciede van desen II heren van Aemstel ende Woerden, ende hebben grotelic versocht an den grave om hulp ende bystant. Die grave heeft desen II heren ontseit, ende is gecomen mit groter macht, ende beleide dat slot te Vredelant mit groot volc van wapenen, ende rechte daervoir grote magnelen ende andere instrumenten, omme dat slot dairmede te quetsen ende te vernielen. Daerna heeft die grave uut Zelant ontboden vrome ende cloeke mannen van wapenen, ende heeft dat slot noch crachteliker beseten ende benauwet, in meninge dat te winnen. Ghijsbrecht, heer van Aemstel, dit vernemende, heeft heimelic een deel volcx vergadert, ende is den Zelanders bi Loenen tegemoet gegaen. Daertegen heeft hem heer Costijn van Renes, der Zelanders cappetein, mit ontwonden bannieren ende blasende basunen in goeder ordinancien geset, ende heeft sine vianden stoutelicken angegaen. Ende dair wort sere gevochten, mer int einde wonnen die Zelanders den strijt. In desen stride bleven doot die here van Bromo mit vele vrome wapentuers ende mannen van oerloge, ende Ghijsbrecht van Aemstel wort gevangen mit veel van sine ondersaten ende strijtber mannen. Aernout van Aemstel, horende dat sijn broeder was gevangen, onsiende den mogentheit des graven van Hollant, heeft hem opgegeven in des graven handen. Ende die grave liet dat slot mit een starc garnisoen besetten ende van als voersien. Ende also Harman van Woerden desen Ghijsbrecht van Aemstel tegen den biscop bistant hadde gedaen, waerom die grave desen versmaetheit van den biscop an desen Harman van Woerden wreken woude; ende dede vergaderen een groot machtich volc van wapenen, om te verwoesten Harmans lant van Woerden. Mer Harman van Woerden overleggende dat hi sodanigen mogenden prince niet wederstaen en mochte, heeft dat slot te Montfoert starc gemaect ende mit volc van wapenen ende provande wel versien ende beset, ende is voer des graven mogentheit gevlucht, ende heeft hem in vreemden landen onthouden. Mer die grave niet oflatende zijn opset, heeft dat slot een jaer lanc crachteliken belegen ende mit dagelixen assaulten ende mit menigerlei instrumenten doen bestormen. Die grave volherdende in desen belegge, heeft ten lesten dat slot gewonnen mit stormenderhant, ende alle die opten huse waren dede hi onthoefden, uutgeseit II. Die grave heeft dat slot mit zijn volc beset, ende heeft dagelicxs desen Harman grote scade in zijn lant gedaen. Ten lesten isser een vrede gemaect tusschen beiden, als dat Ghijsbrecht van Aemstel ende Harman van Woerden, op die verboernissen van allen horen goeden, ende borge daervoer setten souden, beloefden getrouweliken dat si hem voirtan tegen den biscop van Uutrecht noch tegen den grave van Hollant versetten en souden. Ende voer des graven costen souden si sweren des graven hulde ende trouwe, ende die biscop soude zijn sloten weder hebben in zijnre macht. Ende hiervan worden gemaect vaste brieven mitter princen ende segsluden zegelen besegelt. Ende hiermede souden alle twisten ende gescillen nedergeleit wesen tusschen dese mogende princen ende heren. Grave Floris, uut vorsteliker edelheit, heeft uut zijnre herten geset alle haet ende nijt, ende alle dat hem was misdaen; want hi heeft Ghijsbrecht van Aemstel ende Harman van Woerden tot sine secrete raetsmannen ghenomen.
Auteursrechtelijk beschermd