Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen bedrieger die hem seide te wesen keiser Vrederic.
Dat XVI capittel.

In deser tijt openbaerde hem een man in Michen, geleert in die swarte consten van nigromancien, ende seide dat hi was keiser Vrederic. Dese hadde veel heren ende knechten bi hem, de keiser Vrederics dienstknechten hadden geweest; ende veel dingen openbaerde hi, daer hi vele princen ende heren mede verleide, mit menigerhande littekenen. Die Vriesen quamen voer desen keiser, ende claechden dat hen grave Floris van Hollant groten gewelt ende overlast hadde gedaen. Daer ghinc dese bedrieger sitten te recht, in keiserliken gewoude, ende geboet den biscop van Uutrecht dat hi grave Floris voir hem dagen soude, ende comen te rechte mit aldusdanigen brieve:

Fredericus, bi der gracien Gods keiser van Romen, altijt Vermeerder des Rijcs, den eerwaerdigen here biscop van Uutrecht³¹⁰,

310 Uuteecht AB.

[p. 180v]

gruet ende alle goet. Alsoet onser Keiserlicken Majesteit toebehoert alle twisten neder te leggen ende geweldige wercken ende overdaden te straffen, waeromme wi uwer trouheit vermanen, dat ghi te weten doet voir onsen leenmannen den grave Floris van Hollant, dat hi hem onthoude ende ofstae van die crachtelicke ende gheweldige moyenissen des Vriesschen volcs, oft wi sullen tegen hem procederen ende voirtgaen na keyserlicke rechten. Ende waert sake dat dieselve grave hem vermate enighe recht te hebben bi privilegien der keiseren of coningen op dat Vriesche volc, die vri ende nyemants eygen en zijn, so gebieden wi u, dat ghi denselven grave vermaent ende daecht te recht te comen in onsen landen van Michen voer onsen gerechte binnen den tijt van VI weken, mit hem brengende alsulcke brieven ende privilegien als hi hem vermetende is. Ghegeven, etcetera.

Ende als grave Floris dit hoerde, screef hij den bedrieger aldus: En weetstu niet dat die keiser Vrederic in voerleden tiden versmoert bleef van sinen huysgesinne? Du en biste niet die grootmoedige keiser Vrederic; du en biste niet oec enige prince in Michen. Daerom en houde ic niet van dijnre bedriechnisse ende bevele. Dese meester worde daerna ghevangen van den biscop van Colen, ende belide openbaerlic alle sine valscheden ende bedriechlicheden, ende hi liet hem barnen in een dorp geheten Wittefloer, daert vele menscen ansagen.