Van der privilegien die de coninc die stat van Uutrecht gaf.
Dat XII capitel.
Die coninc is van Coelen tot Uutrecht gecomen, daer hi van here Otte van Hollant, biscop van Uutrecht, sinen oem, van den prelaten ende van den burgers aldaer blideliken ontfangen wert ende gemaect een statburger van Uutrecht; waeruut dat hi weder confirmeerde alle die oude privilegien van der stadt ende van der ecclesie, gevende noch daerenboven andere, nijewe privilegien in deser nae bescreven formen: Willem, bi der gracien Goods, coninc van Romen, altijt vermeerder tRijcs. Alle kersten menschen des Rijcks, dye dese privilegienGa naar voetnoot271 sullen sien, gracie ende alle goet. Hoe dat die Coninclike Majesteit sinen trouwen dienres ende ondersaten sijn milde handen uutreyct ende mit ghiften begavet, hoe dat si meer tot sijnre diensten gheneyget worden. Hierom ist, dat wy, anmerkende die pure, trouwe ende warachtige liefde der burgeren van Uutrecht, die si tot onser majesteyt altijt gedragen hebben ende noch kenlick draghen, willen dat si sullen gauderen in sonderlinge vrydommen ende privilegien, ende gonnen hem allen ende enen ijgelic bisonder mits desen, dat gheen prinche, marcgrave, hertoech of edelman, gheestlick noch waerlyck, macht hebben sal den burgeren der stede van Uutrecht buten horen muren mit enighe cijtacien oft daginghe te rechte te stellen in waerlicke saken, bisonder dan alleen die keyser oft coninc des Roomschen Rijcs, indien die biscop hoer heer oft enyghe rechter van des keysers wegen aldaer geset bereijt sijn daer recht ende vonnisse of te gheven. Ghebiedende crachtelick mits desen dat niements tegen dese myn ghifte ende privilegie dye van Uutrecht moeylijck si ende hinder doe; anders soe valt hi in den toorne onser Coninclijcker Majesteyt, ende sal hyerenboven noch verbueren C marck silvers. Hyer hebben by over ende an gheweest als tughen dye eerwaerdighe mannen dye biscop van Sambyen; Aernt, heer van Wesenmael; Henrick, heer van Voorne; Willem, joncheer van Bredenroede; Claes Persijn; Dirck van der Goude; Phillips van Wassennaer; Hughe van Cralingen ende Dirck van Teylinghen, ridderen. Ghegeven binnen Uutrecht, op die XIIII kalende van julio, int jaer Ons Heren M II C ende XLVIII. Ende coninc Willem volbrocht zijn loftenisse, de hi meester Aelbrecht tot Coelen belooft had, ende coofte binnen Uutrecht een rume ende bequaem plaets, den hi gaf in rechter aelmissen den Prekerbroeders, om daer een cloester te stichten, ende gaf hen daertoe een grote zomme van penningen.
Auteursrechtelijk beschermd