Hoe coninc Willem Keyserswaert belach ende wan.
Dat X capitel.
Na desen heeft here Aernt van IJsenburch, aertsbiscop van Trier, den coninc bi hem onthouden VIII weken lanc, met groter menychte van volc, ende besorchde hem van allen provanden ende vitaelgen overvloelic wes hem van node was. Hyernae nam dye coninc oerlof an den biscop ende anderen heren, ende bevalen hem Gode. Ende des anderen dages is hi opgeseten om te versoeken die castelein des Rijcs, daer hi in genen casteleinen wederstoot en vant, si en waren hem alle onderdaen, sonder alleen die castelein van Keyserswaerde. Waerom die coninc dat casteel al omme besat mit groot volc, ende bestormdet mit menigerhande instrumenten, ende wan den castelein die voerpoorte of. Mer hy was soe versien van alles, des men opten huse behoeven mochte, dat hi den coninc dat casteel voerhielt een jaer ende langer. Daer en tenden gebrack den casteleyn provande, ende begeerde an den coninc gracie ende genade. Dye coninc nam hem in ghenade ende dede hem gracie, doe hi hem dat casteel overleverde, ende hi lovede voertan getruwe te bliven, ende tot genen tiden tegen hem te doen. Ende die coninc gaf hem te wive sijn nichte, genoemt Katrijn, here Alfaerts dochter van Bredenrode, ende des heren Alferts oudevader van sijnre moeder wegen was Willem, des conincs oem, sijns vaders broeder. Ende die coninc gaf desen castelein ende sinen nacomelingen dat casteleynscap mittet casteel ende sinen toebehoren te lene te houden van den Roemschen Rijcke ten ewigen dagen. Dit gesciede omtrent XIII dach, also dat die coninc sonder vertrec tot Coelen reysde om sijn sacrificie ende offerhande den Heiligen Drie Coningen te presenteren ende te brengen.
Auteursrechtelijk beschermd