Hoe ende wanneer tcloester van Marienwaert gesticht wert.
Dat V capittel.
Nu comen wi weder op graveGa naar voetnoot162 Dirck van Hollant, die seere naerstich was om te wreken den doot sijns oudevaders grave Florijs, verslagen te Hemert van den grave van Cuyck, ende leyde hem bovenmaten subtile ende behendelicke lagen om Harman, des graven zoen van Cuyck, weder van live ter doot te brengen. Ende hier en mocht hem niements ofbrengen, noch niement en mocht daer tusscen spreken oft enige bestant maken. Ten lesten heeft dese eerwaerdige bisscop Andries, doer stadelicken vervolginge ende instancie desen viantscappe in handen gecregen, ende partien hebben hem submitteert ende tondergegeven alsulken segghen ende uutsprake als hi daer van doen soude; ende dat in aldusdaniger manieren, als dat grave Harman van Cuyck soude stichten een convent van der Premonstreyten oerden in Marienwaert, ende soude dat doteren ende versien mit goede sekere renten. Ende aldus so is dat cloester voerseit gefondeert ende gesticht van den grave voerseit in Marienwaert. Ende daer worden monicken ingheset van Laudunen, die daer onder die regel van der Premonstreyten ende discipline, God dagelixs souden bidden mit horen devoten gebeden voer die ziele van grave Florijs. In welcke convente die eerste abt is geweest Robrecht, des conincs neve van Engelant, een man van groter heilicheit ende disciplinen. Tot welcker eren ende reverencie dese coninc Henrick deerste van dyer namen sende IIII costelicke gaven, als een gulden kelck, seer costelic ornament der missen; een scoen paviment, daer dat sanctuarije in der kercken mede gevloert is; ende enen costelicken zaphiren stene.
Auteursrechtelijk beschermd