Hoe dat keyser Lotharius dese grave gaf dye graefscappe van Oestbergen ende Westbergen.
Dat III capittel.
Als die mogende keyser Henric tot Uutrecht gestorven was, als voerseyt is, wert in sine stede gecoren een vroem prince genoemt hertoge Lotharijs van Sassen, ende was desen graefs Dircs oem; dat is, sijnre moeder Petronellen broeder. Dese Lotharius, keyser, verleende ende gaf dese grave Dirck sinen neve, dat graefscap van Oestergoe ende Westergoe, ende incorporeerde dat weder an Hollant, na der ouder privilegien ende donatien sijnre voersaten, ende heeftet der kercken van Uutrecht weder benomen; ende haer verleent was van keyser Henric die V, sijn voersaet, doer bede van biscop Coenraet van Uutrecht, overmits die rebelheyt van marcgrave Egbert, die dat graefscap alsdoen besat; ende haddet mit sijn hulpers onrechtelicken ende geweldelicken den graven van Hollant benomen int jaer M ende LXXXVI. Dat nu weder bi desen keiser voernoemt ant graefscap van Hollant gecomen is, na dattet omtrent XL jaer daerof vervreemt hadde geweest. Ende om beteren verstant te hebben van desen graefscappe, waer die gelegen sijn, ende wat steden elck in hem heeft, so is te weten dat Westbergen heeft in hem die steden van Staveren, Bolsweert, Sneeck, Sloten, Wolderkom ende Fraenker, mit III costelicke abdien, als te Staveren een abdye van Sinte Benedictus oerde; te Florencamp oft tOudecloester van der Cistercien oerde; te Lidlim, van der Premonstreyten oerde. Ende dit Westbergen beghint uut die Zuderzee of tot Lewerden. Ende van Lewerden beghint Oestberghen, ende strect tot die Lauwers, die doer Dockom loept; ende dair leggen die II steden, als Lewerden ende Dockom, ende III scone abdien, als binnen Dockom Premonstreyten; in Clarencamp van der Cistercien; in Mariengaert oec Premonstreyten.
Auteursrechtelijk beschermd