Van den doot des edelen grave Dircks ende van den edelen die doe ter tijt in Hollant waren.
Dat XIII capittel.
In den jare Ons Heren M ende XCII wert die edele grave Dirck van Hollant sieck ende starf op die XV kalende van september, als die graefinne, na hoer mans doot, [sine moeder], dat lant geregeert hadde II jaer, ende Robbrecht van Vlaenderen, sijn stiefvader, VIII jaer, ende hertoge Govert mitten Buyl van Lottringen IIII jaer, ende biscop Willem een jaer, ende hi selver XV jaer: dat sijn XXX te samen van sijn vaders doot of; ende wert met groter eren ende mit betamelicker uutvaert begraven tot Egmondt int cloester, ende Witilhildis sijn huysvrouwe starf op die XV kalende van september, ende wert bi horen man tEgmondt begraven. Bi sijnre tijt warender vele vrome ridderen in Hollandt, als Aelbrecht, Florijs ende Pieter, joncheren, grave Dircs broederen, ende namaels worden canonicken tot Ludick, als voerseyt is; Willem, here van Bredenroede, here Gerrit van Teylingen, here Baldewijn van Hoesden, here Foppe van Arkel, here Doede van Lederdam, die here van der Lecke, die here van Althena, die here van Putten; here Evert van Binchorst, here Jan Persijn, here Alewijn, casteleyne, dat is burchgrave van Leyden [want die burchgraven van Leyden plegen casteleynen te hieten]; Scataloth ende Trusing, sijn broeders; Dode van Rijswijck ende Ysbrant Gruytwater, schiltknechten.
Auteursrechtelijk beschermd