Van eenre donatie ende ghifte ghegheven van enen ridder ghenoemt Adelphus der kercken van Uutrecht.
Dat V capittel.
Voert so heeft dese eerwaerdige biscop Bernulf ontfangen sonderlinge goeden bi ghifte ende donatie des edelen ridders genoemt Adelphus, waerof hi dese brieven gemaect ende gegeven heeft.
In den Name der Heiliger ende Onversceiden Drievoudicheit. Ic, Bernulphus, der Heyliger Kercken van Uutrecht onwaerdich biscop, wille ende begere dattet allen menschen kundich si, die nu ter tijt zijn of namaels sullen wesen, dat een vry ende edel clerck, Adelphus genoemt, ende die ridderlicke officie ende oerdene gebruykende, enige erfnisse zijnre jurisdictie ende rechtes dat hi hadde binnen dat graefscap van Goetscalc, grave Thuente genoemt (dat is Gore), gegeven heeft Sinte Martijn, mit overdracht, convencie ende consent zijnre enige erfgenaem Wigburch, abdisse van Frikenhorst, doer die hant des advocaets Waloens mit alle datghene datter toe hoert, te weten croften, husen, knechten, weiden, bosschen, wateren, mit alle dat ambocht, dat zijn broederen Werrijn ende Ludolf aldair in hoer leven plegen in des keisers dienst te gebruyken; ende dat dese Adelf bi successie ende erfnisse hiertoe beseten heeft, ende in zijnre macht gehouden, ende hem na der tijt in een beneficie goedertierlic gegeven binnen Thuenten die thienden van X Deventerse ponden; ende noch binnen Trenten die thiende tot VII pont ende een half. Dit is gesciet bi Goer, int pallaes des graves voernoemt, in tegenwoerdicheit van veel tugen. Ende omdat dese milde overghift van waerde soude bliven in der navolgender tijt, hebben wi die mit onsen zegel doen starcken ende besegelen.
Nu willen wi weder keren op die gesten van grave Dirck van Hollant.
Auteursrechtelijk beschermd