Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 109v]

Van die ghiften ende donacien die keyser Otto die Derde gaf desen grave Dirck, den anderden grave van Hollant.
Dat XX capittel.

Als die mogende keyser Otto dye anderde van dyer namen oflivich gheworden was, so is hem int keyserrijck naegevolcht sijn soen Otto die Derde, als voer geseyt is. Dese keyser Otto, uut lieften sijnre moyen Luytgaert, sijns moeders suster, die alsdoe ghehuuwet was an Arnulph oft Aernout, desen grave Dircs soen, ghegeven heeft tot enen vrien eygendom grave Dirck van Hollant voernoemt alle die goeden ghelegen tusschen twe rivieren, die men Liera ende Hista voirmaels plach te noemen, ende tusschen Medeylacha ende Chimmelozara Gemarchi genoemt, ende oec alle alsulke goeden als gelegen sijn in de graefscappen van Masalant, Kunnen ende Texlem. Welcke landen sijn vader Dirck, die eerste graef, van den keyserrijck te lene te houden plach; van welcker ghift ende donatie keyser Otto dye Derde een brief in der formen hierna volghende ghegheven heeft.

In der Name des heyligen ende onverscheyden Drievoudicheits, Otto, by der gracien Goeds, coninc van Romen. Allen kersten menschen die nu ter tijt sijn ende namaels wesen sullen, willen wi dattet kundich ende openbaer si, hoe dat wi doer begeerte ende liefte onser moeder Theophane, keyserinne⁸⁶, ende oec bi supplicatie onser ghetrouwen Egbert, aertsbisscop van Tryer, ende onse neve Henrick, hertoge van Beyeren, onsen getrouwen Dirck, die anderde graef van Hollant, al dat hi tot nu toe in een beneficie ende gaven behouden heeft tusschen die twe waterenvloeden ofte rivieren die men hiet Lyera ende Hisla, tot enen vryen eyghendomme ghegheven hebben, mit al datter an hoert ende in der selver beneficie mitter coninclike beghiftinge begrepen staet ende als usufruct gebruict heeft tot nu toe; ende al dattet dorp Somumen ghenoemt mit alle syne vervallen ende profiten toebehoert, hem voert angheven tot enen vrien eygendom te besitten. Voert, al dat landt datter van onser beneficie is gheleghen tusschen dye twee vloeden, Medemlacha ende Chymmelosara Gemarchi ghenoemt, mit allen sinen appendicien ende anclevinghe, gheven wy nu Dirck voernoemt in een proper ende vryen eyghendom. Noch hiertoe datter leyt int landt Texlen ghenoemt, dat hij in der beneficien hadde, mit al sijn toebehoert, uutghenomen dat men ghemeenlick hyet Huslada, hem gheheel gheven tot sijn eyghen, in der dryen graefschappen gheleghen dye men noemt Masalandt, Kunnen ende Texlem. Ende dat hi van desen goeden vrye macht sal hebben te versetten, te verwandelen ende daermede te doen dat hem belieft. Waerom dat wij dat ghebot onser auctoriteyt hier gheboden hebben te bescriven, ende met onser vingherling te beseghelen ende mit ons eyghen hant onderteykent. Heer Otten teyken des alreedelsten conincks. Hildebaldus, bisscop ende cancellier in der stede van Willegijs, overste cappellaen, hebt recognosceert ende weder overghelesen. Ghegheven op dye VIII kalende van september, int jaer Ons Heren IX C ende LXXXV, int jaer ons keyserdoms dat tweede. Ghedaen tot Nymmaghen, salichlick in den Name des heren. Amen.

86 beyserinne AB.

Nota.

Ende want mitter tijt die namen der landen verandert worden, so ist van node dat wi sommige terminen ende namen van desen brief hier verclaren. Hisla hiet men nu die Ysel; dat dorp Somumen is nu genoemt Sonnemaer, gelegen in Zeelant. Medemlacha, dats nu Medemblic in West-Vrieslant. Chimmelosara⁸⁷ Gemarchi hiet nu Chymeloes ofte Sindoloes in Oest-Vrieslant. Texla is nu Tessel; Masalant is nu Maeslant; Kunnen is een vloet oft water gelegen tusschen Alcmaer ende dat slot Middelburch, van welcke vloet die plaetse oft hoecke lants sijn naem heeft, ende is genoemt Kunemaria, dat ist graefscap van Kenemerlant. Huslada is een jaerlixe exactie oft scattinge, die men jaerlixs gebruyct op die dorpen die die huysluyden ende nyet dye welboren mannen betalen

87 Cchimmelosara AB.

[p. 110r]

moeten, die men nu properlick hiet scot ende buttinge, ende wert tot allen IIII jaren eens betaelt den heer van den landen of denghenen dye den eyghendom daerof heeft.