Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Odilbaldus ghecoren wert dye XII. biscop van Uutrecht.
Dat XVII capittel.

Odibaldus, een seer devoet ende heilich man, gheboren uut Vrieslant, worde nae den doot des gloriosen biscop Hungerus ghecoren dye XII biscop van Uutrecht. Hy was een man die seer milt was, goedertieren ende rechtverdich. Ende als hi noch een clerck was, soe volbrachte hij stedelycken in der kercken den dienste Goods, ende heeft seer naerstich gheweest hem also te hebben, dat hy den Here mochte besitten, ende dat hy van den Here beseten mochte worden in sijn ewighe rijck. Hi versmade alle tijtlyke rijcdomme, ende achte die als

[p. 99v]

slyck der aerden, denckende dat dyegene de mit begeerlicheden, gout oft silver of andere tijtlijcke possessie, lant of goeden besitten, dat God mit dezen Zijn deel nyet maken en wil, wanttet betaemt enen biscop dat hy den armen behulpich wesen sal ende voersien van alle tijtlicken nooottrufticheit, ende het is den priesterliken staet ene grote scande ende oneerlicheit, dat sij hem daertoe geven om tijtlike rijcdomme bieen te vergaderen. Ende als dese Odilbaldus dat bisdom mit groter eren, mit goeden exempelen ende leringe XXXIIII jaer lanck hadde berecht, is hi salichliken in den heer gestorven int jaer Ons Heren IX C, op die IIII ijdus van december, ende wert eerlicken begraven in Sinte Salvatoers monster, bi sine voervaders. Dese eerwaerdige here ende biscop hadde inpetreert ende vercregen die confirmatie der privilegien, goeden ende rechten des kercks van Uutrecht, ende hierenboven heeft hi noch mit een coninclike bulle vercregen trecht zijnre kercken, ende dye dominatie⁵³

der kercken van Tijel, die alsnu van de Denen was gedestrueert, mit alle sine landen, weijden, bosschen ende andere sine toebehorn ende noch de stede van Deventer, myt alle sine tollen, tot ewigen daghen te besitten.

53 domiancie AB.