Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Keiseren.
Anno VIII C ende XV.
Dat LXXVI capittel.

Lodewijck, deerste van dier namen, Kaerls zoen, wert keyser van Romen, na sinen vader, ende wert geheten Lodowijck die Goedertieren, ende wert van den paeus Stephano gewijt ende gesalvet tot enen Roomschen keyser, als voorseit is. Dese keyser Lodewijck bedwanc in den eersten die Gascongers, die Engelsche, ende voert die Saracenen, die den hoofstat genoemt Cesar Augusta ingenomen hadden te staen tot zijnder obedientien ende gehoorsaemheit. Ende als hi dese voornoemde feyten bedreven hadde, heeft hi bi consent ende wille des paeus Stephani die IIII een generale dachvaert gehouden tot Aken van vele biscoppen, heren, prelaten, ende heeft aldaer sinen soen Lotharijs genomen tot enen medegeselle ende regeerder, dats tot enen Roomschen coninc, ende beval hem Ytalien ende Spangen te regeren, nadat hi van den paeus Pascalis opten heyligen Paeschdach gesalvet ende gewijt was. Den anderen soen Puppijn maecte hi coninc van Aquitanien, ende Lodewijck, zijn III soen, ordineerde ende maecte hij te wesen prince ende coninc van Beyeren ende Germanien, dat is over al Duytslant mitten Swaven. Dese III sonen hadde coninc Lodewijck bi zijn eerste wijf, genoemt Ermgaert, eer hi keyser wert; na wiens doot nam hi een ander wijf, genoemt Judith; ende was hertoge Welpijns dochter van Beyeren, dair hi bi wan enen soen genoemt Kaerl die Caluwe, coninc van Franckenrijc, ende na keyser van Romen, die Hollant eerst uutgaf in³¹¹ handen zijnre suster soen genoemt Dyerick, als ghi na horen sult. Dese keyser Lodewijck voornoemt was seer naerstich om die geboden Goeds te onderhouden; seer oetmoedich, ende een vroem voervechter des heyligen kersten geloves; waerom dat hi anderwerf int V jaer sijns keyserrijcs een concilium tot Aken vergaerde, ende institueerde aldair vele statuten ende puncten angaende geestlicke ende waerlicke personen, diewelke Amalarius in een boeck vergadert ende bescreven heeft doer beveel des paeus voorscreven. Daer hi onder veel andere puncten ordineerde dat een ygelicke kercke zijn renten soude hebben, dair die priesters op mochten leven, omdat nyements ghyericheit den dienste der ecclesie soude tot winsel ende bate gebruken, ende opdat Goeds dienste doer enige gebrecklicheit niet versuymt en soude worden noch ontbreken. Voert dat biscoppen, prelaten ende clercken gheen costlicke noch siden clederen, noch gordelen mit goude, paerlen ende gesteenten doerstict en souden dragen; wanttet een grote abusie ende quade maniere is, dat geestlicke luden, die tot Goeds dienst gedeputeert ende geschict zijn³¹², uutwendich ende pomposelic mit siden, fluwelen ende camelotten clederen ende gewaden verchiert zijn, ende die gebruken, dwelc altesamen meer strect tot ambicye ende hovaerdicheit des werlts, dan tot stichtinge ende goede exempelen der waerlicker luden. Ende volgen meer na die voetstappen des ambiociosen ende ydelen biscops Pouwels van Samosatenen, die mit costlicke hecxelen, mit vele gesins van geestlicke ende waerlicke personen, mit siden ende fluwelen habiten gecledet te ryden plach, dan si voer oegen nemen ende navolgen die voetstappen der apostelen ende der heiliger biscoppen Sinte Martijn, Sinte Willeboort ende Sinte Bonifaes, mit meer andere.

311 iu AB.

312 geschicztijn AB.