Hoe dat die Sassens versloeghen hertoge Godefrijt, des conincks Kaerls ambassaet, ende wat wraeck daerom gedaen worde.
Dat LXIIII capittel.
Daerna, int jaer VII C ende XCVII, sende coninc Kaerl hertoge Godefrijt als ambassiaet, mit veel andere vorsten, tot Sijgefrijt, coninc der Denen, begerende dat hy by hem wilde comen. Mer die Sassens mitten verlopen Hunen hebben desen hertoge mit sinen geselscappe lagen geleyt, ende hem mit alle zijn heren oneerlic gheslagen ter doot bi Noort-Halbingen. Waerom mit recht die coninc seer toornich geweest is, ende quam mit een groot heer ter plaetsen Minden genoemt, mit groot volc van vapenen, ghebiende dat men niement sparen en soude in die plecke lants der Sassens Noort-Halbingen. Twelcke also gesciet is. Ende die coninc quam weder tot Aken, bewenende zijnder princen doot. Ende als die coninc vertogen was, zijn die Noort-Halbingers mitten Sassens ende Hunen weder ineen vergadert, ende bestonden an te vechten ende te verwoesten die Abdoriten, des conincs vrienden, daer hiervoerGa naar voetnoot284 of gheseyt is. Mer Tascho, hoer coninc, quam mit zijn heer den Sassens tegemoet op een plaets Semitaria, dat is tVoetpat genoemt. Ende die coninc Tascho van den Abdoriten versloech IIII M SassensGa naar voetnoot285. Ende die ander seer vermoeijt wesende, liepen weder in hoer landen.
Auteursrechtelijk beschermd