Hoe dat die coninc van den Abdoriten jammerlic verslagen wert, ende die coninc der Hunen kersten wert.
Dat LXII capittel.
Des jaers daerna, als die coninc weder in Sassen gereist was, int jaer van XCV, om dye voervluchters ende rebellen Sassens te castien, die noch geen genade en begeerden ende is gecomen in dat vermaerde dorp genoemt Bardowich. Tot welcker plaetsen die coninc ontboden heeft te comen alle die vorsten ende edelen van Slavonien, die alsdoe mitten coninc verenicht waren. Ende siet, daer is oec bi den coninc gecomen Wisin, coninc van den Abdoriten, daer hiervoer of ghescreven is. Ende gaf hem ende sijn lant onder des conincs Kaerls protectie ende bewaernisse. Dit wetende die verbannen ende voervluchtige Sassens leiden heimelike lagen int wederom keren, ende sloegen desen coninc Wijsin doot mit alle sijn volck. Coninc Kaerl dit vernemende was seer verstoert ende gram, ende geboet dat men sonder genade te vuere ende te swaerde dien einde lants van Sassen, daer dese moert gesciet was, vernielen, verwoesten ende destrueren soude, dwelck also gedaen wert. Op dese selve tijt quam tot coninc Kaerl int voernoemde dorp Bardowich die prince der Hunen, geheten Tondijn. Ende gaf hemselven ende alle sijn lant in des conincs handen ende sine gehoersamheitGa naar voetnoot282, begerende mit alle sijn volck gedoopt te werden; dat also gesciet is. Ende die coninc quam weder tot Aken mit groter eren ende victorien.
Auteursrechtelijk beschermd