Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Adelbricus impetreerde van den groten coninc Kaerl confirmacie der goeden van sijn ouders der kercken van Uutrecht gegeven, ende hoe hi sant den heyligen man Sinte Ludgher in Sassen ende Vrieslant dat volck te bekeren. Ende hoe Adelbricus van deser werlt scheyde ende starf.
Dat XXXV capittel.

Dese eerwaerdige man biscop Adelbricus, die sere sorchvoudich was om sine bevolen kercke ende creesdom te vermeren, verbeteren ende bewaren, vercreech mit groter naersticheit dat die hoechgeboren here coninc Kaerle van Franckenrijck confirmeerde ende vestichde alle die goeden, renten, landen, thienden ende chijnsen die sine voervaders der heyliger kercken van Uutrecht gegont, gegeven ende verleent hadden. Ende daerenboven, soe gaf dese voerscreven coninc Kaerle der kercken van Uutrecht vele lants leggende op die Lecke ende Ysele, ende tusschen den Rijn ende die Lecke, ende op die stroem van der Heim, mit allen sinen toebehoren, husen, woningen, knechten, bosschen, campen, weyden, wateren ende watervloeden, roerende ende onroerende, in allen schine als grave Wigger die van hem te houden plach, mitten foreesten ende wildernissen, Hengheest, Scoten, Forenholte, Mocoroth ende Wijdock, leggende op beiden siden van der rivieren Heim. Ende gaf noch daertoe in den dorpe van Opkercken C stucken lants tusschen den Rijn ende die Lecke, om die rustelic ende ewelic te gebruyken²⁵⁹, ende heeft dit mit sine besegelde brieven confirmeert ende ratificeert.

Hierna heeft Adelbricus gesonnen den heylighen man Sinte Ludgher, mit vele sine gesellen ende discipulen, totten Vriesen

259 ggebruyken AB.

[p. 65r]

in den landen van Oestergo ende Westergo, totter stede van Dockem, daer wilen eer die heylige man Sinte Bonifaes voer theylige geloef gemartirizeert ende gedoot was, om den Friesen, die Sinte Bonifaes daer bekeert hadde, ende doer hertoge Wydiking van Hoech-Frieslant of Neder-Sassen weder van den ghelove gedwongen ende ghevallen waren, weder te brengen totten rechten kersten ghelove, ende was aldaer VII jaer lang, doende groten arbeyt ende naersticheit, destruerende die tempelen der afgoden, lerende ende prekende den volcke den wech des ewigen salicheits. Ten lesten reysde hi tot Romen, visiterende die heylige apostelen Sinte Pieter ende Pouwels; ende wederomme comende, heeft hem die coninc van Franckenrijck, Kaerl die Grote, geset ende geordineert te wesen een harder ende pastoer der stat ende kercken van Minimigarden, dat is Monster, ende heeft hem ghemaect die eerste biscop van Monster. Ende heeft mit sijnre heyliger leringe ende predicacie die West-Phalens ende Sassens gebrocht totten heyligen kersten gelove, alle die van God daertoe vercoren ende voersien waren. Ende na vele teykenen ende wonderlicke miraculen die hi in sinen leven gedaen heeft, is hi van deser werlt gesceyden, ende heeft God sinen heylighen siele gheoffert, ende starf tot Billerbeke int jaer ons Heren VIII C ende IX, opten VII kalende van aprille, ende sijn lichaem wert mit groter eren ende droefnissen van sine canonicken ende medebrueders begraven tot Werden. Ende omdat dese heylige man vele goets ende vromelicken gepredict²⁶⁰ heeft in desen Stichte van Uutrecht onder II biscoppen van Uutrecht, als Gregorio ende Adelbrico, daerom wert hier int cort van hem wat gescreven. Sijn legende is overal te crigen: men lese dat int lange. Ende als die heylige ende devote here Adelbricus zijn bisdom mit groter naersticheit ende arbeyt, lerende ende wisende sine ondersaten die wech des ewigen salicheyts, regeert ende beseten hadde X jaer, is hi salichlic in den Heer gestorven, opten XII kalende van september, int jaer ons Heren VII C ende XCIIII, ende wert mit betamelicker uutvaert begraven in Sinte Salvatoers Monster, by sinen voervaderen.

260 gepredicct AB.