Hoe dat Sinte Willeboort consacreert ende gewijt wert tot Romen tot enen aertschen biscop van Uutrecht.
Dat VII capittel.
Binnen desen tiden, dat Sinte Swigbert dus naerstich was in den bouwe der bekeringe ende dat oncruyt der afgodyscap uuten landen verdreef, was Sinte Willeboort noch in Brabant. Ende doir grote instancien ende oetmoedige supplicatien des voornoemden Puppijns, want hi in hem sach grote volstandicheit te prediken dat Woort des Heyligen Evangelijs, vercreech hi an hem dat hi tot Romen toech, gevende hem mede brieven van credencien ende supplicacien an den paeus van Romen. Sergius paeus, deerste van dier namen, wert in sinen visioen van den engel vermaent, dat hi desen Willeboort waerdelicken ontfangen ende biscop consacreren wilde, dat welke die paeus met groter eren ende solemniteyten gedaen heeft, ende ordineerden op Sinte Ceciliendach, ende in hoere kerken tot enen aertsbiscop van Uutrecht, vercierende hem mit eenen scoudermantel, ende gaf hem enen niewen name, ende hieten Clemens; ende behilt hem een wijl tijts bi hem, ende sant hem weder mit bliscap tot hertoech Puppijn ende tot sinen bevolen scapen. Ende als dese Clemens, die Willebroort hiete, die benedictie van den paeus ontfaen hadde, is hi wedergekeert in Duytslant. Ende hertoge Puppijn heeft Willeboort, comende van Romen sonder vertreck in Batavien tot Uutrecht gesonnen, dair hi onlanxs te voren den coninc Rathbolt der Vriesen uut verdreven hadde. Ende corts dairna, vernemende Swigbert dat Willeboort van Romen gecomen was, is hi hem mit groter bliscappen te moete getogen tot Embric, ende heeften mit groter eren ende eerwaerdicheit ontfangen. Ende verhorende dat die heylige man Swigbert biscop gewijt was, ende dattet graefscap van Teysterbant mit die gehele Betue ende een groot deel van Neder-Vrieslant ende Hollant overmits sine salige predicacye totten heyligen gelove gebrocht was, heeft hi God den Here grotelic gedanct mit groter innicheit, omdat die ecclesie tot Uutrecht int getal der kerstenen sere vermeert was. Ende zijn gesamenderhant daerna tot Uutrecht getogen, ende aldaer int fondament van Sinte Thomaskerc een kerck van canonicken gefondeert ende gesticht in die ere van Sinte Martijn biscop van Tours, vaste bi dat slot Wiltenburch. Ende Sinte Willeboort heeft dese kerck mit Sinte Swigbert gewijt ende zijn cathedrael oft biscoplike stoel daer geset voer hem ende alle sine successoers ende nacomelingen. Ende dat Willibrordus biscop gewijt was tot Romen, dat was int jaer VI C ende XCVI. Ende dat si tesamen dese eerste domkercke widen, dat was int jaer VI C XCVII, want hi langer dan een jaer tot Romen ende in Vrancrijck was.
Auteursrechtelijk beschermd