Hoe dat hertoge Puppijn den coninc Rathboldt van Vrieslant verwan, ende hoe Sinte Willeboort een bedehuys mit een fonte gesticht heeft in der eren des Heyligen Cruys.
Dat V capittel.
Daerna, doe men screef VI C ende XCII, heeft hertoge Puppijn van Brabant een groot heer van volc vergadert, ende is mit al den hoop op die Vriesen getogen. Daertegens quam coninc Rathbolt mit sinen Vriesen, mer Puppijn heeften verwonnen ende daer toe gebrocht, dat hi theylige doopsel ontfangen soude. Waerom dat hertoge Puppijn weder in Vrancrijck comende, Willeboort mit sinen gesellen weder in Vrieslant gesonnen heeft om den coninc Rathbolt mit sijn volc totten gelove Cristi ende theylige doopsel te brengen. Mer want hi doer des conincs Rathbolts wreetheid ende verhartheit niet bedriven noch vorderen en mochte, is hi wederom na Oest-Francrijck, dats tUtrecht getogen, daer hi onlanxs dat volc tot Cristus kennisse ende gelove gebrocht hadde. Welke stadt van Uutrecht doe noch stont onder die heerscappie ende mogentheit der coningen van Francrijc, als van den tijt of dat si Rathboldt der Vriesen coninc daeruut verdreven hadden, als voorscreven is. Ende siet, die heylige man Willeboort is tUtrecht gebleven, ende heeft veel pristeren bi hem vergadert, ende heeft bi die vervallen ende omgeworpen kercke van den Vriesen, die wilen eer coninc Dagobert van Vrancrijc in der eren van Sinte Thomas hadde gesticht, een bedehuys ende capelle in der erenGa naar voetnoot223 des Heyligen Cruys getimmert, ende een fonte des heyligen doopsels daerin geset, om dat daer, overmits die starcheit des slots dat daer stont, alle goetwillige menschen souden mogen dat sacrament des doopsels sonder sorge ende vrese ontfangen. Ende hi heeft sine discipulen hiergelaten, ende is wederom in Vrancrijc tot hertoge Puppijn getogen, ende dit bedehuys ende fonte wert gesticht int jaer ons Heren VI C ende XCV.
Auteursrechtelijk beschermd