Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Julius enen strijt hadde tegen die van Trier, teghen die van Ludick, Doernick, Henegouwen ende Vlaminghen.
Dat VI capittel.

Hierna heeft Induciomarus, cappeteyn van Trier, groot volck vergadert, ende dochte mit niet Labienus volck ende legioen te verslaen, ende dan alsoe voert Julius te bevechten mitten Lukeners ende die van Dornick. Mer Labienus mit opset veinsde hem, of hi vervaert hadde gheweest, ende heeft alsoe den cappeteyn van Trier, slap ende negligent wesende, haestelick ende onversienlick bevochten ende verslagen. Uut welcke victorie van Labienus hebben die ander Walen haer conspiracie ende anslach ofgestelt, ende Julius heeft dat ander deel des winters te rustiger geweest. Niettemin merkende dat hem noch veel grote striden nakende waren, ende datter veel van sijn volck verslaghen ende seer ghewont waren, screef Julius totten raetsheer Gneus Pompejus om hulp ende bistant, ende dat hi hem nijewe legionen senden wilde. Twelck Pompejus dede, ende sende hem drie legioenen eer noch die winter ten einde was; mit diewelcke heeft Julius in tbegin der lenten den verstroyden ende vervaerden menichte sijnre vianden eer si byeen

[p. 22v]

conden comen, bevochten¹⁴⁴, ende is alre eerst ghecomen in tlant van Duway, Vermandoys, Amyens ende Atrecht,ende principalick in tlant van Doernick; ende nam daer enen groten roof, dien hi sinen zoudenieren ende knechten mildelicken liet onder malcanderen delen ende behouden. Hierna is hi na Vlaenderen ghetogen, die overmits den marasschen ende bosschen sonder sorch scenen te sitten, ende heeft se mit drie verscheyden heren van volck bevochten, ende veel seer wredelick verslagen; ende die andere in handen ghenoemen. Daerna is hi ghetogen in Henegouwen ende int lant van Ludick, om te wreken den doot van Cotta ende Sabine, sine legaten, die de Lukenners verslagen hadden, als voerseyt is. Mer doe Julius vernam dat si hemselven in der bosscagen ende wildernisse van Ardenne versteken hadden uut vresen sijnre toecoemst, ende en woude se¹⁴⁵ in onbekenden plaetsen niet volgen, gaf hi een ghebot doer heel Walslant, dat een ygelijck sonder verboeren ruten ende roven mochte int bosch van Ardennen dat boven LX M passen lang was, streckende van den Rijn of, in die einden van Trier, tot Doernick, ende vanghen ende spannen na sijnre belieften alle die si conden crighen. Ende mit deser cloecheit heeft Julius sijn leet ghewroken ende sijn vianden doer beveinsde vrienden doen verslaen, sonder enich perikel oft verlies van tRoomsche heer.

144 bevochte AB.

145 wondese AB.