Watapana. Jaargang 2

[p. 26]

Identifikashon

Mi ta
un isla chikito
den lamán di volkán,
ma su rèis
ta hankrá te den mundo su entraña.

Mi pecho
ta un kunuku
di pal'i maíshi,
ku, manso, ta dobla
bòw'i biento di bida,
ma spièrto e ta lanta
pa ratón di hipokresía.

Mi rosea
ta un brisa di sèit,
ku ta drumi
den kweba di mi alma,
ma piká di fòrk'i Satán
ta but'ele bula
fo'i soño su muraja.

Mi kara
a wanta boftá di lamán
i mi kurpa a wanta
karbachi di orkán,
pero mañán, mañán
mi ta armá
ku un harnas di baranka.

Henry Habibe